No.1808/2020-2021

Lawngtlai, Nikir thla ni 8, 2020: Vawiin khan District Administration, Police, Health Department leh MJA Lawngtlai District te chu Additional Deputy Commissioner Pu K. Laltlawmlova, MCS hovin a pisaah an inkawm khawm a. COVID-19 dona leh a laka invenna kawnga District dinhmun leh hma sawn a tulna lai te an sawi ho.

Lawngtlai District chhunga COVID-19 positive case pahnih hmuh chhuah chungchangah Addl DC chuan zawm tura sawrkarin inkaihhruaina hrang hrang a siamte uluk taka zawm zel a nih avang leh positive hmuh chhuahte hi tha taka khung hran sa an nih avangin mipui tan chi-ai phahna tur a awm lo tih a sawi a. Mipuite chu mahni inveng thiam tur leh mi thiamte'n tih tur leh tih loh tur an sawite zawm thiam turin a chah.

State pawn atanga lo hawte khung hranna quarantine centre eng emaw zat hmun hran hranah a awm a, he'ng hmunte hi fimkhur taka enkawl an nih avangin a bul hnaia khawsate tan tih leh thinhrik viau a tul lo tih he inkawm khawmnaah hian sawi lan a ni a. Quarantine centre hi duty-te tan lo chuan tlawhpawh phal a ni lo va, a duty-te pawh him tura fimkhur taka ruahmanna kalpui a nih avangin lo thinhrik tawk an awm thin chu thil hriat chian loh vang a ni a, an tana harsatna siam khawpa khawsa lo turin mipuite an ngen.

Health department-a District hotute chuan COVID-19 chu natna hlauhawm tak ni mah se, hlauh dan dika hlauh loh va, pawngpaw thlabar chiam chuan a dona kawngah a pui lo va, a dotute leh hna thawktute tan harsatna a thlen zawk thei tih sawiin, pawn chhuah tam loh, mi dang nena inawm hnaih loh, hmui tuamna hman that, kut sil fai ngun leh kut fai lova hmui hmai leh ei tur khawih lohte chu tun dinhmuna invenna tha leh pawimawh ber a ni rih, tih an sawi.

Thu thar theh darhtute chuan an hriat duh hrang hrang leh mipuiin an hriat awm thil pawimawh an tihte an zawt a, hma lak chhoh zelna tura thu rawn an neihte an sawi bawk.

District thuneitute'n an tar lan danin, tun thleng hian Lawngtlai District chhungah COVID-19 kaihhnawiha khung hran mi 1011 an awm tawh a. Tuna khung hran mek zat hi 664 a ni.

Medical lam hotute'n an tar lan angin, a hmasa lama hmarchhak state leh Tamil Nadu atanga lo haw Rapid Antibody Test (RAT) reactive-te leh Telangana atanga lo hawte swab sample laa Zoram Medical College (ZMC)-a RT-PCR test tura thawn 45 chu a negative vek a. Hemi hnua Red Zone atanga lo hawte swab sample an lak chhoh mekah ZMC-a RT-PCR test turin swab sample 397 thawn a ni leh tawh a, khung hran laite sample lak hmabak hi 153 a la awm. Result hriat theih chinah 54 chu negative-in, positive case pahnih (2) hmuh chhuah a ni tawh a. He'ng positive-te hi mipa ve ve, kum 18 mi leh kum 25 mi, Delhi atanga lo haw, quarantine facility-a khung hran lai an ni a. An taksaah natna lang chhuak a la awm lo va, Covid Care Centre-ah a hranga dah niin, an hriselna dinhmun hi vil reng a ni.