Vawiin khan Lawngtlai District Water & Sanitation Committee (DW&SC) chu an Chairman, Bawrhsap Pu N. Chakhai MCS hovin Lawngtlai DC Conference Hall-ah an thu khawm a. Lawngtlai District chu ODF-a puan tlak a ni ngei em tih finfiah dan tur an sawi ho.

He hunah hian PHE Executive Engineer Er Laltlanchhunga chuan Swachh Bharat Mission (Gramin) hnuaia an hma lakna sawiin, inthiarna mumal nei lo chhungkaw 9542 ek in saksak tur chu March 2018-ah an sak zawh vek tawh thu a sawi a. Hemi avang hian Lawngtlai District chu pawnlera inthiar awm lohna (open defecation free) district-a puan theih a ni tawh a. Chumi hma chuan DWS committee chuan pawna inthiar an la awm leh awm loh hi a enfiah phawt a ngai a ni, a ti.

Lawngtlai District chhung dinhmun hriat nan hian endik tur khaw pariat thlan tur a ni a. Lawngtlai District-a RD block pali awmah block tin atangin khaw pahnih theuh - Chawngte Block-ah Kamalanagar leh West Saizawh, Bungtlang 'S' Block-ah Bungtlang 'S' leh Hmunnuam, Lawngtlai Block-ah Paithar leh Upper Saikah, Sangau Block-ah Lungpher 'S' leh Siachangkawn te thlan chhuah an ni a; committee member-te chu team hnihah insiamin, chan insemin an endik dawn a ni.

Team-te hian chawlhkar leh chhungin he'ng khuate hi an endik ang a. An endikna atangin state-ah report pein, chu chuan Lawngtlai District hi ODF-a puan theih a nih leh nih loh a hril dawn a ni.