Vawiin (23.08.2016) chawhnu dar 1 khan Nehru Yuva Kendra, Lawngtlai leh MHIP Electric Veng Branch huaihawtin Lawngtlai Circuit House Meeting Hall-ah thalaite intawh khawmna hun (District Youth Convention) buatsaih a ni a. Lawngtlaia Youth Club hrang hrang ai awh thalaite an kal khawm.

He intawh khawmnaah hian Khuallian Lawngtlai DC Dr A. Muthamma chuan ram hmasawn nana thalaite pawimawhzia sawiin, sawrkar hma lakna hrang hrangte a hlawhtlin theih nana theihtawp chhuahpui turin thalaite chu a sawm a. Lawngtlai District hma sawn nana ke pen zel tura fuihin, an hriselna ngai pawimawh a, an theihna leh thiamnate ram tana chher hriam zui zel turin a chah bawk.

Nehru Yuva Kendra Sangathan (NYKS) Aizawl Zone-a Zonal Director Pu Sukharam Bishnoi-a chuan Lawngtlaia Youth Club te’n an tih tur an hlen chhuak tha hle tih sawiin, Lawngtlai thalaite chu fakawm a tihzia a sawi a. Thalaite chher hriam nana pawl tangkai tak NYK hnuaiah Youth Club din belh zel tura sawmin, ram tana chhen fakawm tham hma lakna neih tum turin a chah.

He hun hi Lawngtlai Sub-Headquarters MHIP President Pi Vanlalhlupuii Fanai-in a kaihruai a. Electric Veng VC leh Branch MHIP atanga thu sawi leh malzai te ngaihthlak niin, Lai Cultural Troupe te’n hnam lam an entir a. NYK Lawngtlaia MTS Pi K.Lalhmachhuani’n lawm thu sawiin hun a khar a ni.

He hunah hian Lawngtlaia Youth Club 20 chuang hnenah foot-ball leh volley-ball leh net te sem chhuah a ni a. He’ngte hi thalaite tihphur nan leh an intuai hriam nan te, infiamna kawnga hma an sawn zel theih nan tea ruahman a ni.