No.1881/2020-2021

Lawngtlai, Nikir thla ni 10, 2020: Vawiin khan Lawngtlai District Level Task Force on COVID-19 leh Lawngtlai khawpui chhunga VLTF ai awhte, quarantine facility nodal officer-te leh zonal officer-te chu DLTF Chairman, Lawngtlai Bawrhsap Pi Shashanka Ala, IAS hovin DC Conference Hall-ah an thu khawm a. COVID-19 hri leng darh zel tur khuahkhirh a nih theih nana Lawngtlai District chhunga inkharkhip kalpui dan tur an sawi ho.

Thut khawm tan hma hian, Fungsih chhuaha India leh Myanmar inkal pawhna ramri venga duty-te zinga mi, damlohna avanga Sangau PHC-a nimin, June ni 9, 2020 chawhnu dar 1:00-a boral ta, vawiina vui tur, Sangau-I nula, H. Lalvenmawii (kum 18) sun nan minit khat chhung ngawi renga din a ni a. Meeting chhunzawm nghal a ni.

Chairman Pi Shashanka Ala chuan June ni 9 atanga June ni 22, 2020 chhunga Mizorama COVID-19 avanga inkharkhip kalpui chhunzawm dan tura state sawrkar atanga ruahmanna awmte a sawi fiah a. Hemi ruahmanna bawh zui dan tur leh hemi chungchanga Lawngtlai District chhunga chet lak chhunzawm dan tur te ngaihtuah ho a ni.

Tun dinhmunah Lawngtlai District chhungah COVID-19 positive case pali (4) hmuh chhuah ni tawh mah se, quarantine facility-a tha taka khung hran sa an nih avangin mipui nawlpui tan hlauhthawnawm lo tura ngaih a ni a. Hei vang hian District chhunga inkharkhip kalpui chhunzawm dan turah DLTF-in thu neihna a neihna china inkaihhruaina tur duan nghal a ni a. Lawngtlai khawpui leh Chawngte tih loh District chhunga khaw dang zawngah chuan state sawrkarin zawm tur inkaihhruaina a siam chin bakah chuan khuahkhirhna siam a ni lo va. Lawngtlai leh Chawngteah erawh June ni 11-17 (ni 7) chhung atan uluk takin inkharkhip hi kalpui phawt ni se, tih a ni.

Lawngtlai leh Chawngtea inkharkhip kalpui chhung hian mipuiin harsatna an tawh loh nan in sak leh hna thawh laklawh chu chhunzawm phal a ni a, VLTF-te hriatpuina erawh a tul dawn thung. Ni tin mamawh leh damdawi (essential commodities) dawrte chu hawn theih a ni ang a, dawr dang erawh VLTF-te ruahmanna angin inhawn chhawk thin a ni ang. He'ng dawrah te hian a dawrtute an inhnaih chilh lutuk loh nana ruahmanna siam kawngah dawr neitute'n mawh an phur ang a, an tih theih loh chuan dawr hawntir phal a ni lo vang. Damdawi dawr tih loh dawr dang reng reng chu tlai dar 5 thleng bak hawn phal a ni lo.

Khawpui chhungah lirthei intlan chhawk a tul lo vang a, chutih rual chuan tul leh pawimawh bik leh sawrkarin a phal chin ni lova lirthei chhuahvah erawh a rem dawn lo va, man an awm chuan dan anga hma lak zel a ni ang.

Khawlaia mihring inhnaih chilh loh (social distancing) chu zawm zel tur niin, mi panga aia tam hmun khata awm khawm phal a ni lo va. Zan dar 7:30 atanga zing dar 4:30 inkarah COVID-19 kaihhnawiha duty leh DC-in phalna a pek ni lo tu mah khawlai chhuah phal a ni lo va, hemi chungchangah hian DC atangin inkhuahkhirhna thupek tihchhuah a ni ang.

Ram dang nena ramri chu la khar chhunzawm zel a ni a. Zirna in, biak in leh vantlang puipunna hmun hrang hrangte pawh khar chhunzawm a la ni rih dawn a. Inneih inkhawm leh mitthi vuinaah mi 35 aia tam pun khawm khap a ni.

Pawn chhuak tur reng rengin tha taka hmai tuam zel tur a ni a. DLTF chuan mipuite chu fimkhur reng tur leh tul bik tak tak lovah chuan pawn chhuah tum lui lo turin a ngen a. COVID-19 laka mipui an him theih nan, quarantine centre awmna veng VLTF-te chu invenhimna chungchangah an veng chhunga inkhung hranna hmunte chu vilpui deuh tura ngen an ni bawk.