No.6603/2020-2021

Lawngtlai, Sahmulphah thla ni 19, 2020: Vawiin khan Lawngtlai District Level Task Force on COVID-19 (DLTF) chuan tun hnaia Lawngtlai District-a vantlang zinga COVID-19 kai an pun zel avangin Lawngtlai DC Conference Hall-ah thut khawm hmanhmawh (emergency meeting) kovin, hri darh zel tur ven nana hma lak dan tur an rel.

Chairman Dr Andrew H. Vanlaldika chuan COVID-19 hri leng kaihhnawiha Lawngtlai District dinhmun tlangpui tar langin, Lawngtlai District chhungah vantlang zinga hri kai hmuh chhuah belh zel a nih avangin leh Lai Autonomous District Council (LADC) Inthlanpui hmachhawn mai tur a nih bawk avangin hri leng laka Lawngtlai District a him theih nan hma lak dan tur ngaihtuah a tul a ni, a ti a. Member-te chu ngunthluk taka ngaihtuahna seng turin a ngen nghal bawk.

LADC Inthlanpui lo awm turah inthlan thil kal mek tam tak a awm avangin a kaihhnawih tel political party-te pawh he meeting-ah hian sawm tel an ni a. Political party ai awhte, Central YLA lam leh Chief Medical Officer atanga thu sawi ngaihthlak a nih hnua member-te sawi hona atangin Lawngtlai District chhunga vantlang zinga hri inkai darh zel tur ven nan leh felfai taka contact tracing tih a nih theih nan tul lova mipui chet velna khuahkhirh a pawimawh tih a ni a. Hemi atan hian Lawngtlai khawpui chhung leh District chhung khaw thenkhat, vantlang zinga hri kai hmuh chhuahnaah te ni nga chhung atan eng emaw chin inkhuahkhirh (partial lockdown) ni se, tih a ni.

Inkhuahkhirhna kalpui dan tur chu Bawrhsapin hriattirna (notification) a chhuah dawn a ni.