No.6432/2020-2021

Lawngtlai, Sahmulphah thla ni 3, 2020: Vawiin khan Lawngtlai District Level Task Force on COVID-19 (DLTF) leh quarantine facility nodal officer-te leh zonal officer-te chu DLTF Chairman, Lawngtlai Bawrhsap Dr Andrew H. Vanlaldika hovin DC Conference Hall-ah an thu khawm a. COVID-19 hri leng mek dona kawnga October thla chhunga Lawngtlai District-a Unlock 4.0 kalpui dan thlir letin, hma lak zui zel dan tur an sawi ho.

Chairman Dr Andrew H. Vanlaldika chuan Lawngtlai District-ah vantlang zinga COVID-19 hri kai hmuh chhuah an nih tak avangin tan lak leh zual a tul hle tih a sawi a. Sawrkar leh VLTF leh tlawmngai pawlte chu tang rual a, inthlahdah lova hma lak ho zel a pawimawh a ni tiin, thawh hona tha leh zual siam turin a ngen a. COVID-19 laka him turin mi tinin mahni mawhphurhna hriat chian a tul thu sawiin, sawrkarin inkaihhruaina a siam leh fimkhurna dan a zamte chu thu awih taka zawm turin District mipuite a chah a ni.

Vawiin meeting-ah hian Incident Commander/SDO(Sadar) Pu V. Lalruatliana, Chief Medical Officer Dr LC Liana, District Medical Superintendent Dr Zothanpari Chhakchhuak leh Quarantine Centre Nodal Officer Pu R. Lalbiakthanga te hnen atangin report ngaihthlak a ni a. Member-te'n October thla chhunga Unlock 4.0 kalpui dan leh ni 26.10.2020 atanga 'No Tolerance Fortnight' hman mek kalpui dan thlir letin, COVID-19 laka mipui him nana hma lak zel dan tur hrang hrang an sawi ho a ni.

He thut khawmah hian Lawngtlai District-a 'No Tolerance Fortnight' hman mekah mipuite thlawpna a that thu tar lan a ni a. Kohhran leh pawl dangte paw'n sawrkar an ngaichang thiam leh thu awih taka dan an zawm thin chu member-te'n lawmawm an tih thu an sawi a. Hri leng darh zel tur dan chahna kawngah a tam thei ang ber inbiak pawh leh inrawn tlan a pawimawh thu sawi lan a ni.

Dawr leh pun khawmna hmun danga hming ziah thin chu hri leng darh zel tur venna leh chhui chhuahna (contact tracing) atan thil pawimawh tak a nih avangin mipuite pawhin tha taka zawm a, mahni hming pum, veng leh phone number te dik taka ziak thin turin DLTF chuan a ngen a. Smartphone hmang chin chuan Sulhnu app hman tangkai tum hram turin a ngen bawk.