No.4649/2020-2021

Lawngtlai, Mimkut thla ni 1, 2020: Vawiin khan Lawngtlai District Level Task Force on COVID-19 (DLTF) leh Lawngtlai khawpui chhunga VLTF ai awhte, quarantine facility nodal officer-te, zonal officer-te leh kohhran hruaitute chu DLTF Chairman, Lawngtlai Bawrhsap Dr Andrew H. Vanlaldika, MCS hovin DC Conference Hall-ah an thu khawm a. COVID-19 hri leng mek kara Mizoram sawrkar thuchhuah bawhzuia September thla chhunga Lawngtlai District-a Unlock 3.0 kalpui dan tur an sawi ho.

Chairman Dr Andrew H. Vanlaldika chuan COVID-19 hri leng vanga inkhuahkhirhna chu mimal eizawnna leh mipuite harsatna sut kian a nih theih nana thlahdul deuh a nih rualin, mipuite tan fimkhur zual sauh a tul thu a sawi a. August thla chhunga Unlock 2.0 kalpui chungchanga Lawngtlai District-a frontline worker-te, Medical, Police, department hrang hrang, VLTF leh tlawmngai pawlte hna thawh fakin, Unlock 3.0 kalpui chungchangah thahnem ngai taka thawk ho leh turin a sawm nghal a ni.

Vawiin meeting-ah hian Incident Commander/SDO(Sadar) Pu V. Lalruatliana, MCS leh Asst Nodal Officer i/c Quarantine Facility Pi Lalremsangpuii, DFDO te hnen atangin report ngaihthlak a ni a. District Medical Superintendent Dr Zothanpari Chhakchhuak pawhin Lawngtlaia COVID-19 test-na tur TrueNAT khawl bun chungchang report pein, khawl hi laboratory-ah bun fel a nih tawh thu leh kar leh lam chuan hman tan theih a nih an beisei thu a sawi a. Addl SP Pu C. Lalruatkima pawhin police lam hma lakna tar langin, Lawngtlai District Magistrate-in COVID-19 hri leng kaihhnawiha thupek a chhuah bawhzuia an duty-naah August thla chhungin thupek zawm lo leh bawhchhia mi 649 an man thu leh an sum chawitir tling khawm pawh Rs 1,83,300/- a nih thu a sawi.

Chairman-in Unlock 3.0 kalpui dan tura Mizoram sawrkar thuchhuah a chhiar chhuah hnuah a bawhzui dan tur sawi ho nghal a ni a. September thla chhung atana inkaihhruaina angin, sawrkar office-ahte kut silna hmanrua dah tur tih te, appointment neite chauhvin office dawr tur tih te, mask hman that leh office building leh a chhehvel tihthianghlim te chu khauh zawka kalpui ni se, tih a ni a. Zan dar 8:30 leh zing dar 4:30 inkara pawn chhuah khap (curfew) pawh khauh taka lekkawh zel tum niin, phalna nei lova vantlang hmuna mi 5 aia tam awm khawm pawh khap chhunzawm a ni.

Zirna in hrang hrang chu September ni 21, 2020 thleng khar chhunzawm rih tur niin, biak ina mipui inkhawm pawh la tih rih loh tur a ni a. Zing tawngtai inkhawm, inneih inkhawm leh lawmna, mitthi vuina, lungphun, anniversary, politics leh pawl thila kal khawmnaah mi 50 aia tam pun khawm te, infiamna leh lehkhabu tlangzarhnaah mi 25 aia tam pun khawm te, tournament leh puipunna dang huaihawt te pawh khap chhunzawm rih tur a ni.

Mitthi vui chungchang bikah mi 50 aia tam pun khawm loh tur tih leh kohhran/community hall emaw, veng chhunga hall remchang dang emawa vuina hun hman tur tihte chu VLTF leh kohhrante'n khauh zawka kalpui tur leh zawm turin ngen an ni a. COVID-19 hri leng laka fimkhurna tur hrang hrangte chu veng chhung tlangau/au rinna kal tlanga uar zawka puan leh thin ni se, tih a ni.

State pawn atanga lo haw reng reng chu sawrkar thuchhuak anga quarantine zel an nih laiin, state chhunga chet velna hrang hrangah hri kai nena inhnaihchilh awm palh theih a nih avangin, fimkhur thilah hmun danga zin chhuak tur leh lo haw tur reng reng chu mahni veng chhung VLTF-ah inhriattir zel tura tih a ni bawk.