No.292/2021-2022

Lawngtlai, Tau thla ni 27, 2021: Vawiin khan District Rural Development Agency (DRDA), Lawngtlai District buatsaihin BDO BNRGSK Hall, Lawngtlaiah Jal Shakti Abhiyaan (JSA) hnuaia hma lakna, ruahtui khawl pawimawhzia inzirtirna, "Catch the Rain" (Rainwater Harvesting) campaign, 2021 hun hman a ni a. Lawngtlai Bawrhsap Dr Andrew H. Vanlaldika'n a hmanpui.

Lawngtlai DRDA Project Director Pi Marilyn Rualzakhumthangi kaihhruai he hun hmanah hian Khuallian, Bawrhsap Dr Andrew H. Vanlaldika chuan tui chu thil nung tinin nunna leh khawsak nana kan mamawh bulpui ber pakhat a nih avangin ngaihthah a thiang lo tih a sawi a, tuihna tlem zel kara mihring pung zel vanga tui mamawh sang zel si-ah ngun taka ngaihtuahna sen a, a taka hma lak a tul tak zet a ni, a ti.

Sawrkar leh mi thiamte'n ruahtui khawl leh tui renchhem inzirtir nan hma la mah se, a hlawhtlinna chu khua leh tuite kut a nih thu sawiin, Khuallian chuan he huna kal khawm khawpui chhunga Village Council ai awhte chu an huam chhungah awmze nei taka zirtirna kalpui tur leh mipuite entawn tura hmahruaitu nih tum turin a chah a. Tuihna tlem chho zel leh ramngaw chereu nasa lutuk pawh tuihna siam pung zawnga hma lak a ngaihzia tilangtu nia a hriat thu sawiin, ruahtui tla luan raltir mai lo va, awmze nei taka khawl chu tihmakmawh a ni, a ti.

Vawiina Lawngtlai DRDA buatsaih Catch the Rain campaign-ah hian PHED Lawngtlai WATSAN Division-a Sub-Divisional Officer Er T. Mangliandinga leh DRDA Lawngtlaia Programme Assistant Pu R. Malsawmdawngliana Khawlhring te'n ruahtui khawl dan, khawl tura hma lak a tul tawhzia leh tuihna tipung tura hma lak dan tur te an zirtir a. Ruahtui khawl (Catch the Rain) chungchanga Chhimtuipui Wildlife Division-a Deputy Conservator of Forests Pu Samson Thanruma thu ziah chu sem a ni bawk.