MLA Inthlanpui 2018 lo awm tura Lawngtlai District chhunga constituency pathuma Flying Squad (FS)-te tan ni 8.10.2018 khan Lawngtlai DC Conference Hall-ah training buatsaih a ni.
He hun hi Lawngtlai District Election Officer Pu N. Chakhai MCS chuan hmanpuiin, inthlan felfai leh muanawm tak a awm theih nan mawhphurhna nei zawng zawngte tha taka thawh ho a tul a ni, a ti a. Pawimawh bik emaw pawimawh lo deuh emaw a awm chuang lo tih sawiin, tu mah inthlahdah lovin mahni mawhphurhna theuh fel taka hlen chhuah tum turin training tura kalte chu a sawm a ni.
He hunah hian Election Officer Pu Lalrinawma MCS leh Sub-Deputy Commissioner Pu Lalsanglura MCS te chuan Flying Squad member-te chu an tih tur leh hna thawh dan tur te an hrilhfiah a. An hna thawh nana an thil mamawh tur hrang hrang pawh an sawi ho nghal bawk.
Flying Squad hi inthlannaa suma intham leh inlei te, zu emaw, vote lei theihna tur thil dang emaw sem a awm loh nana hma latu tur an ni a. Chuti ang kaihhnawih report an dawn chu an bawh zui zel dawn a ni. Lawngtlai District chhunga constituency tinah squad pahnih theuh din an ni a. Anni hi inthlan Expenditure Monitoring Cell member an ni nghal bawk ang.
