Lawngtlai, Khuangchawi thla ni 2, 2020: India Hnam Pa Mahatma Gandhi pian champha phak puala kum tina buatsaih thin October ni 2-9 awh tur Faina Hapta (cleanliness week) 2020 chu Lawngtlai District tan tukin zingkar khan Lawngtlai DC Conference Hall-ah Bawrhsap Dr Andrew H. Vanlaldika, MCS chuan a hawng.

Khuallian Dr Andrew H. Vanlaldika chuan faina chu ram hmasawnna tehfung pawimawh tak leh hriselna leh hlimna nen pawha inzawm tlat a nih avangin fai chu khua leh tuite mawh phurhna a nih thu a sawi a. District headquarters-a chengte chu thingtlang khuate'n an entawn ber an nih avangin District fai ni turin District headquarters-a chengte'n faina kawngah theih tawp chhuah a pawimawh a ni, a ti. Fai leh thianghlimna chu hnim sam fai leh bawlhhlawh langsar tihfai ringawt a ni lo va, thil eng kim a nih dan tur taka felfai taka kalpui chu fai dan dik a ni tiin, lirthei atanga bawlhhlawh paih mai te, kawng sira leivung paih ringawt te, in sakna bungrua leh bungraw dang kawngpui kama dah hnawk thin te chu ram hmangaihtu zia a ni lo va, khua leh tui tha chuan faina kawnga mite entawn tlakin a nun a hmang tur a ni, a ti a. Faina chu faina hapta chhung chauh ni lovin, kum tluana kalpui a, nunpui turin kal khawmte chu a chah a ni.

Lawngtlai UD&PA-a District Project Officer (DPO) Pu V. Lalruatliana, MCS chuan hun kaihruaiin, kum 2020 faina hapta pualin faina kawnga inelna thuang hrang hrang buatsaih leh tur a nih thu leh lawmman erawh chu Republic Day, 2021-ah sem tur a nih thu a sawi a. Lawngtlai DIPRO Pu C. Lalhruaitluanga, MIS kaihhruaiin 'Faina Thutiam' (Swachhata Pledge) chham rual a ni bawk.

Tukin hun hmanah hian LADC leh state sawrkar official-te leh VC leh tlawmngai pawl hrang hrang ai awhte an tel a. COVID-19 hri leng avangin kum dang ang erawh chuan hun hman theih a ni lo.

Kumin faina hapta pual hian Lawngtlai khawpui chhunga veng fai, sawrkar office fai, sikul fai leh hotel/thingpui dawr fai thlan a ni leh dawn a. Inelna hi district level bakah, state leh national level thlenga kal chho tur a ni.