No.2452/2021-2022

Aizawl, Khuangchawi thla ni 2, 2021: India Hnam Pa Mahatma Gandhi pianchampha phak puala kum tina buatsaih thin, Faina Hapta (cleanliness week) chu kumin hian October ni 2 - 8 inkar chhung hman tur niin, Lawngtlai District tana a hawnna hun chu tukin zingkar khan Lawngtlai Bazar Venga Areopagy-ah Lai Autonomous District Council (LADC)-a Chief Executive Member (CEM) Pu V. Zirsanga hovin hman a ni.

Pu V. Zirsanga chuan faina chuan hriselna a nghawng a, hnam a timawiin, thianghlimna a thlen tih a sawi a. Faina chu thil a awmna tura awmtir a nih thu sawiin, hmasawnna rahbi pawimawh tak a nih avangin faina chu ngaih pawimawh a tul a ni, a ti. Faina kawnga hma lakna chu sawrkar leh department kutah chauh dah lovin, chhungkaw tinin mahni in leh a vel atanga bul tana hma lak a tul thu a sawi a. Faina kawnga kan hma lak danin eng ang chhungkua nge kan nih a tihlan avangin chhungkaw changkang leh entawn tlak ni turin faina nunpui i tum theuh ang u, tiin kal khawmte chu a sawm a ni.

Faina hapta hawnnaah hian Lawngtlai UD&PA-a District Project Officer (DPO) Pi TT Beikhaizi chuan hun kaihruaiin, Rev. R. Laldawngliana, UPC(M) chuan hunserh a hmang a. UD&PA Lawngtlaia District Manager Pi VL Ramnunsangi'n report pein, Lawngtlai DIPRO Pu C. Lalhruaitluanga kaihhruaiin faina thutiam chham rual a ni a. LADC-a Local Administration Officer Pu D. Huanneihmawia'n lawm thu a sawi bawk.

Kumin faina hapta thupuiah hian "Faina - Kan in leh a chhehvel atangin (Cleanliness - From our home and its vicinity)" tih chu hman a ni a. Faina hapta chhung hian kawng hrang hrangin hma lak dan tur ruahman a ni.

Tukin hun hmanah hian LADC leh state sawrkar hnuaia official-te, village council leh tlawmngai pawl hrang hrang ai awhte bakah, Lawngtlai khawpui chhung veng tina faina palai (ambassador)-te an tel a ni.

He hunah hian September ni 29, 2021 atanga October ni 2, 2021 inkar chhunga Azadi Ka Amrit Mahotsav hma lakna atangin LADC Sanitation Department-a sanitation worker mi 35 (mipa 24 leh hmeichhia 11) hnenah chawimawina thuziak hlan a ni a. An zinga mipa thawk tha bera thlan Pu Vanlalzaua leh hmeichhe thawk tha bera thlan Pi Lalnunpuii te hnenah citation leh pawisafai Rs 3,000/- ve ve hlan a ni bawk.

Attachment

  • Loading attachment...