3661/2023-2024

Lawngtlai dated 5th February 2024: Vawiin chawhma khan DC Conference Hall, Lawngtlaiah District Level Committee on Fire Prevention bultumin ‘Fire Prevention Week 2024’ hawnna hun hman a ni a. Pu Abraham Beirazi Khithie, Addl. DC chuan hun kaihruaiin Pu V Zirsanga. Chief Executive Member, LADC chuan khuallian niin a hmanpui.

Pu V. Zirsanga, Chief Executive Member, LADC chuan tun hma chuan ram kang ven kawngah Lawngtlai district chu Mizoram pum a titha thlan chhuah zingah an tel thin thu sawiin 2019 hnu lam hian an lan chhunzawm tak loh thu a tarlang a. Lawmman beisei vang ni lovin ram leilung hausakna ven him leh humhalh chu kan zavai mawhphurna a ni tih hre thar a tan la zel turin kalkhawmte a chah a ni. Ram ngaw chu nungcha tinreng chenna, boruak thianghlim leh tuihna min petu a nih angin in mamawh tawn vek kan nih thu CEM chuan tarlangin ‘Fire Prevention Week 2024’ thupui atan ‘Neitu nihna thinlung puchungin ram ngaw veng him la, nunna I humhim a ni’ tih chu vawng reng turin a chah bawk a ni.

Pu K.Lalromawia, DCCF, LADC chuan kum 2023 chhung a Lawngtlai district-a kangmei ven hna kalpui a nih dan te tarlangin khaw 30 chuang ah Awareness Program neih a nih dan te, Village Level Fire Prevention award buatsaih thin a nih dan te sawiin kumin pawh hian kangmei ven kawng a thawk tha khaw pathum thlan chhuah an nih tur thu a sawi bawk a ni.

Fire Prevention week hawnna ah hian Lawngtlai district chhung a Sawrkar pisa hrang hrang a thawktute leh tlawmngai pawl hruaitute telin ram leilung hausakna humhalh kawng a thawktu ni tur a thu tiam chham rualna hun neih a ni bawk.