383/2024-2025 

2024 Ṭau thla ni 29: Vawiin khan kumin fur lo thleng tur atana inpuahchahna hrang hrang sawi hovin Lawngtlai District Bawrhsap & District Disaster Management Authority Chairman Pu Cheemala Siva Gopal Reddy hovin a office chamber-ah ṭhut khawm buatsaih a ni.

Lawngtlai DDMA Chairman Pu Cheemala Siva Gopal Reddy chuan Mizoramah fur ruahtui a tla tam ṭhin tih sawiin, furpui lo thleng turin khuarel chhiatna hrang hrang a thlen theih avangin lo inralrin lawk a ṭul a ni, a ti a. Hmasawnna hna thawh hrang hrangte fur thlen hmaa thawh zawh a nih theih nan works department te chu chak taka hma la tura chahin, department hrang hrangte pawh eng, tui, kawng, buhfai, ni tin mamawh, hriselna kaihhnawih leh thil dangah fur laia harsatna a awm loh nan mahni zawn ṭheuhvah inpuahchah turin a chah a. Fur laia lei min, kawng chhia leh chhiatna chi dang a thlen thulha DC Office-a Disaster Control Room-ah report vat ṭhin turin District mipuite chu a chah bawk a ni.

He hunah hian sawrkar department hrang hrang hotute, Lawngtlai District VC Association ai awh leh tlawmngai pawl ai awhte an tel a. Khuarel chhiatna leh chhiatna hrang hrang thleng thei laka sawrkarin inpuahchahna leh ruahmanna a neihte tar lan niin, chiatna tuarte ṭanpuina kawngah sawrkar aṭangin chhawmdawlna leh zangnadawmna te a ṭul anga ngaihtuahsak leh pek ṭhin an nih thu tar lan a ni a. Kumin fur lo thleng turah mipuiin harsatna an tawh loh nan sawrkar, VC leh tlawmngai pawlte ṭha taka thawh ho ni se, tih a ni a. Harsatna leh chhiatna thleng a awmin thuneitute hnena rang taka thlen vat a pawimawh thu tar lan a ni bawk.