Vawiin khan Lawngtlai District chhunga constituency pathum - 36-Tuichawng, 37-Lawngtlai West leh 38-Lawngtlai East Assembly Constituencies atana General Observer Pu P. Bala Kiran IAS chuan political party hrang hrang ai awhte chu Lawngtlai DC Conference Hall-ah a ko khawm a. Inthlan felfai leh muanawm tak a awm theihna tura thil pawimawhte a sawipui. Pu P. Bala Kiran chuan Lawngtlai District chu India rama state ralmuang berte zinga mi a ni tih leh inthlan muanawm taka buatsaih thin a ni tih a hriatin lawmawm a tih thu a sawi a. Political party hrang hrangte chu mimal thil taka inbeihna leh dawta inchirhtheh te awm lova thianghlim taka campaign tura chahin, tum dang ang bawka inthlan felfai tak a awm theih nana thawh hopui turin a sawm nghal. He hunah hian Lawngtlai District Election Officer, 37-Lawngtlai West Constituency-a RO Pu N. Chakhai MCS, Lawngtlai SP Pu Amit Goel IPS, 38-Lawngtlai East Constituency-a RO Dr Andrew H. Vanlaldika MCS leh 36-Tuichawng Constituency-a RO Pu R. Lalremsanga MCS te bakah, election official-te leh political party ai awh leh candidate agent-te an tel a. Model code of conduct chungchang leh candidate expenditure chungchangte pawh sawi ho a ni.