Vawiin khan Lawngtlaia office hrang hrang hotu lute chu November ni 14-a Mizoram Governor Lt Gen. Nirbhay Sharma'n Lawngtlai a rawn tlawh huna lo dawnsawn dan tur relin Bawrhsap Dr A.Muthamma IAS hovin DC Conference Hall-ah an thu khawm.

He hunah hian Governor programme duan sa thlir ho niin, chumi zulzui chuan ruahmanna siam a ni a. Governor lo kal tur hi state lam leh LADC lam tang tlanga lo dawnsawn ni se, tih a ni.

Ruahman lawk dan chuan November ni 14 chhunah Governor hi helicopter-in a lo thlawk ang a. Lawngtlai Helipad-ah DC leh CEM hova lo hmuah tum niin, hetah hian Guard of Honour lo pek a ni ang. A lawmna leh kawmna hun chu LADC Hall-ah buatsaih tum a ni a. Hemi hnu hian helicopter atangin KMMTTP kawng laih mek chu a en ang a, Siaha a pan zui nghal ang.