No.932/2021-2022 

Lawngtlai, Nikir thla ni 11, 2021: Mizorama kum tina June ni 11-a hman thin Green Mizoram Day chu vawiin khan Lawngtlaiah pawh hman a ni a. He ni pual hian Lawngtlaia sawrkar department hrang hrang leh District MJA te chuan COVID-19 laka him tura sawrkarin inkaihhruaina a siam zawm chungin Lawngtlai leh Mampui inkar kawngpui kamah thing tiak eng emaw zat an phun a ni.

COVID-19 hri leng avangin kum danga Green Mizoram Day hawnna inkhawm buatsaih thin chu buatsaih ni lovin, thing phun turte hian thing phunna hmun tura District Level Committee on Green Mizoram-in a thlan Mampui kawng lam hi an pan nghal a. Nodal department, Lai Autonomous District Council (LADC)-a Environment, Forest & Climate Change Department lamin department hrang hrangte thing phunna tur hmuna thing phun tur leh a hungna tur an lo chhawp lawk angin department hrang hrangte chuan thing hi phunin, he'ng an thing phunte hi tha taka hungin, an chhinchhiah fel vek bawk a ni.

Vawiina Green Mizoram Day hmannaah hian Lawngtlai Bawrhsap Dr Andrew H. Vanlaldika leh LADC-a Executive Member i/c EF&CC Pu CL Lianzuala te pawhin thing hi an phun a. Vawiina thing phunte hi herhse, thlado, lenhmui, ngiau, etc. a ni a, a vaiin thing tiak 283 phun a ni.

Kumin Green Mizoram Day thupuiah hian "Tui hna leh boruak tha siam nan thing i phun ang u" tih hman a ni a. Lawngtlai District Level Committee chuan kum 2021 Green Mizoram Day-a thing phunte hi mahni phun theuh enkawl zui turin department-te chu ngenin, thing phun enkawl thate hnenah lawmman pakhatna atanga pathumna thleng siam a ni dawn a ni.

Kangmei ven kawnga thawk tha khua chawimawina 'Village Level Fire Prevention Award 2021' siam chu Green Mizoram Day pual hian a dawngtu khuate hnenah sem a ni a. Lawmman pakhatna hi Siachangkawn khuain an dawng a; pahnihna chu Lungpher 'S' niin, Paithar chu pathumna an ni. Lawmman pakhatna hian Rs 50,000/- leh thuziak, pahnihnain Rs 30,000/- leh thuziak, pathumnain Rs 20,000/- leh thuziak te a keng a ni.