627/2023-2024
2023 Ṭomir thla ni 30: Vawiin khan Lawngtlai District Level Committee on Green Mizoram chu Lawngtlai DC Conference Hall-ah Lawngtlai Sub-Divisional Officer (Sadar) Pu Daniel Sailo hovin an ṭhu khawm.
Member Secretary Pu K. Lalromawia, District Council Conservator of Forests, LADC chuan Green Mizoram Day hman ṭhin dan tlangpui a sawi fiah a. Nikuma Lawngtlaia Green Mizoram Day hmannaa thing 350 phun chu a zavaia a nun vek thu leh ngun taka enkawl zui a nih thu a sawi.
Vawiin ṭhut khawmah hian kumin Green Mizoram Day June ni 11 chu Pathianni a nih avangin, Lawngtlaiah chuan June ni 9-ah hman ni se, tih a ni a. Kaladan Multi Modal Transit Transport Project kawngpui kamah, nikum lama thing phun tawhna hmabaah kumin hian thing ṭiak 380 phun ni se, tih a ni. Green Mizoram Day hawnnaah Deputy Commissioner chu Khuallian atan ruat niin, Khuallian leh LADC leh state sawrkara mi pawimawhte'n a bika thing an phunna tur ruahman ni se, tih a ni a. Day puala inkhawm tawi chu thing phunna tur hmun remchangah hman ni se, hetah hian kangmei ven kawnga thawk ṭha khua/veng thlan chhuahte hnenah lawmman hlan ni se, tih a ni.
Vawiin ṭhut khawmah hian kumin Green Mizoram Day thupui atan "Thing phun i la, enkawl zui ang u" tih hman a nih thu tar lan niin, thupui behchhan hian department hrang hrangte'n an thing phun enkawl zui se, nakkum Green Mizoram Day hman hunah thing phun enkawl ṭha ber hnenah lawmman hlan ni se, tih a ni a. Nakkum lama Green Mizoram Day hman a nih leh hunah kawngpui kama thing phunte hlamchhiah si lovin, sawrkar hmun ruak remchang lai, ramngawa siam theih tur lo zawn lawk a, ramngaw siam tura hma lak ni se, tih a ni bawk.
Vawiin meeting-ah hian sawrkar department hrang hrang hotute, zirna in leh tlawmngai pawl ai awhte leh District MJA hruaitute an tel a ni.
Attachment
- Loading attachment...
