817/2025-2026

Lawngtlai, 11th June 2025 : "Ruahtui khawl nan thing i phun ang u (Plant trees and catch the rain)"  tih thupuia hmangin, vawiin khan 'Lawngtlai District Level Committee on Green Mizoram  2025' bultumin 'Green Mizoram Day' Lawngtlaiah hman a ni a. He ni pula inkhawm tawi hi DC Office kawt tualzawlah zing dar 10:30 khan neih a ni a, Pu K. Lalthanzara, Executive Secretary, LADC,  chuan hun kaihruaiin, Pu Cheemala Siva Gopal Reddy, IAS, Lawngtlai bawrhsap leh Chairman, District Level Committee on Green Mizoram,  nibawk chuan a khuallian niin a hmanpui.

Pu Cheemala Siva Gopal Reddy, IAS, chuan kalkhawmte hnena lawmthu sawina a nei hmasa a. Green Mizoram Day-  chu kum tin hman thin a nih angin, kuminah pawh rilru thar pu a, thahnem ngai taka thawkchhuak turin a chah a. Thangtharte tana ram nuam leh chhenfakawm siam tura  thingphun uar a tul thu sawiin, Mimal, Kohhran, Sawrkar leh NGO-  ten thinphun lamah harhtharna neih a tul tak zet a ni, a ti. Bawrhsap chuan kumin  'World Environment Day' puala thing tiak  thahnem tak phun a lo nih tawh thu tarlangin, Green Mizoram Day puala thingphun a ni leh dawn chu  thil lawmawm leh hriatreng tlak a ni, a ti.

Bawrhsap chuan hmasawnna hnathawh hrang hrang avang te, Lo neih vanga lo hal te bakah ram tihkan avangin kum tin ramngaw zau tak tih chereu a nih thin thu a tarlang a. Ramngaw tih chereu hian nungchate bakah mihringte tan harsatna kawng tam takin a thlen mek a ni, a ti. Ram nuam leh hrisel  zawk siam tura ramngaw neih that a pawimawh thu tarlangin, thingphun uar sauh sauh turin  kalkhawmte leh Lawngtlai mipuite a sawm a.  Pu Cheemala Siva Gopal Reddy, chuan  'Green Mizoram Day'  puala department hrang hrang- ten  thing an phun tur chu lawmawm a tih  thu sawiin, vawiin  hnathawhah duhtawk mai lo tur leh an  thingphun enkawl puitling ngei turin department hotute  a chah nghal bawk.

Pu C. Thanliana, DCF (WL) Mizoram, chuan Green Mizoram Day - puala thu intiamkamna sawiho a kaihruai  a. Green Mizoram Day - hmannaah hian kangmei chhuak tur ven kawnga thawk tha khua pathum hnenah  'Village Level Fire Prevention Award 2025' hlanna neih nghal a ni. Lawmman hi Khuallian Pu Cheemala Siva Gopal Reddy, chuan hlanin, lawmman  dawngtute chu

1. Thaltlang VC : Rs. 50,000 + Citation
2. Ngengpuikai VC: Rs.  30,000 + Citation
3. Sangau -II  VC : Rs. 20,000 + Citation

Green Mizoram Day pual inkhawmna neih zawh  hian Lawngtlaia Department hrang hrang ten  thingtiak phun hnatlang an nei nghal a.  NH 02 - Saikah 'L' leh Chawntlangpui inkar kawngpui dungah thingtiak - 390   an phun a ni. Thingtiak phun hi a tam zawk 'Mesua ferrea ( Herhse)' Mizoram State Tree - niin, Thingtiak phun tak te hi  hi Environment, Forest & Climate Change Department, LADC ten an tum a ni.