DIRECTORATE OF INFORMATION & PUBLIC RELATIONS, Government of Mizoram, India

No.1128/2020-2021

Lawngtlai, Tomir thla ni 16, 2020: Vawiin chawhma khan Mizoram sawrkar Health & Family Welfare Department Secretary Pu H. Lalengmawia, IAS hovin Lawngtlai DC Conference Hall-ah COVID-19 hri leng mek dona kawnga Lawngtlai District hma lakna hrang hrang thlir ho a ni.

He hunah hian District Level Task Force member-te leh Lawngtlai District-a medical officer (doctor)-te an kal khawm a. Lawngtlai Bawrhsap Pi Shashanka Ala, IAS chuan thut khawm kaihruaiin, District chhunga COVID-19 hri leng beihna kawnga hma lak dan tlangpui a tar lang a. Lawngtlai SP Pu Amit Goel, IPS chuan District chhung leh ramria ven him hna thawh dan a tar lang bawk.

Health Secretary chuan chhim lam district-te dinhmun a tak ngeia hmuhpui a, an harsatnate hriatpui tura feh chhuak an nih thu a sawi a. COVID-19 hri leng beihna kawngah State Level Task Force, District Level Task Force leh Village Level Task Force te thawh hona leh tan rualna tha tak avangin Mizoram chhung bik chu fihlima ngaih theih a nih thu sawiin, state pawn leh ram pawn atanga kan unau lo haw turteah vanduai palh an awm theih avangin fimkhur erawh a la tul hle a ni, a ti a. Mizoram chhung chu him rih mah i la, ram thenawm leh state thenawmah a veite'n min hual khup avangin inthlahdah erawh a thiang lo a ni, a ti.

Health Secretary chuan hri leng laka himna tura fimkhurna tura mi thiamte thurawn hrang hrang chu tha taka zawm zel a pawimawh thu sawiin, tha taka hmui tuam thin te, mi dang nena inhnaih chilh lutuk loh leh kut sil fai ngun te chu thlahthlam hauh loh tur a ni, a ti a. Hmui tuam nan man to taka lei kher ngai lovin, rawmawl leh puan pangngai pawh hman mai theih a nih thu te, hand sanitizer to tak tak aiah sahbawn hmanga kut sil fai mai a that zawk thu te a sawi a. VLTF duty-te'n mi dang harsatna thlen lo va, an harsatna hrang hranga puih zawk chu tih dan tur dik tak zawk a ni, a ti.

Health Secretary hian COVID-19 hri leng dona kawnga Lawngtlai District hma laknaah sawrkar a lungawi thu sawiin, District Administration, police, DLTF, health department, VLTF leh mipuite thawh honaah lawm thu a sawi a. Tlawmngai pawl hrang hrang inpekna fakin, Central YLA hma lakna chu chhuanawm a tih thu a sawi a. District chhunga MLA-te'n an bial mipuite an ngaihsakna chu fakawm a tih thu leh LADC-a CEM leh a thawhpuite hna thawh chu ropui a tih thu sawiin, kohhran hrang hrangin sawrkar an thawhpuina leh mipuite'n thu awih taka sawrkar an tawiawmnaah te lawm thu a sawi.

Food & Drug Administration (FDA) Controller Pu Lalsawma Pachuau chuan Mizoramah COVID-19 laka hman tlak loh hand sanitizer a tam thu leh a lem siam te pawh an awm thu sawiin, alcohol-based 60%-80% lo chu lei lo turin mipuite a chah a. Hand sanitizer lem nia rinhlelh a awm chuan FDA-a thlen thin tura chahin, hand sanitizer chu rinpui bera neih chi a ni loh thu leh sahbawn hmanga kut sil fai chu a that ber thu a sawi.

Dr Vanlalrengpuia Chinzah, SPM, NHM pawhin thu sawiin, COVID-19 chu natna chi thar a nih avangin a chanchin hriat kim a la awm lo va, zir chian mek zel a nih avangin WHO leh mi thiamte'n zawm tur an tihte tha taka zawm zel chu invenna tha ber a ni, a ti a. COVID-19 laiin natna chi dang pawh ngaihthah chi a ni chuang lo tih sawiin, hriselna kawngah fimkhur reng a tul thu a sawi.

Lawngtlaia hun an hman zawh hian Health Secretary te chuan Siaha an pan leh nghal a ni.

Attachment