Vawiin khan Govt Region High School, Lawngtlaiah Mizoram Board of School Education (MBSE) bul tumin Lawngtlai District-a high school leh higher secondary school zirtirtute tan Integrated Evaluation Scheme (IES) software training buatsaih a ni.

Hun hmanpuitu Lawngtlai District RMSA Deputy DPC Pu H. Laltanpuia chuan hawnna thu sawiin, MBSE-in zirtirtute tana rualkhai zawka zirtirna kalpui a nih theihna tura software training an buatsaih chu lawmawm a tih thu a sawi a. Zirtirtute chu an thil zir tharte uluk taka chhinchhiah a, an hna thawhnaah tangkai taka hmang zui zel turin a chah.

He training hi MBSE Regional Office, Lungleia Regional Officer Pu R. Lalthlamuana chuan a kaihruai a. MBSE Aizawla Academic Officer Pu Michael Lalrinmawia chuan kal khawmte hnenah PowerPoint presentation hmangin zirtirna a pe a ni.

Vawiina training an buatsaih hi kumina MBSE-in district hrang hranga IES software training an buatsaih tawpna ber tur a ni a. Vawiin hian Lawngtlai leh Champhaiah te he training hi a ruala neih a ni.

IES hi kum 2016-2017 academic session atang khan high school-ah hman tan niin, kum 2017-2018 session atang khan higher secondary school-ah hman tan a ni ve thung a. MBSE-in ruahmanna a kalpui angin, sikul kalphung pangngai kum tawpa vawi khat exam hmanga naupang result siam chu tibovin, final/board exam-ah mark 80 leh internal exam-ah mark 20 neih a ni ta zawk a. He scheme hnuaiah hian kum tluanin naupangte'n an zirlai thlah miah lova an zir theih nan class test, term exam, assignment leh attendance te chu internal mark chhut nan hman a ni a. Hei bakah hian, naupang hriatna tizau thei tur leh an hriselna lam atana pawimawh (General Studies, Work Education leh Physical & Health Education) te pawh neih tel a ni bawk.

Vawiina IES software training-ah hian Lawngtlai District chhunga sikul 84 atangin zirtirtu 53 an tel thei a. Remchan zawkna avangin a hma lama training an buatsaihah Lawngtlai District chhunga zirtirtu 12 chu Siahaah an lo tel tawh a, zirtirtu 2 pawh Lunglei lama training neihah an lo tel tawh bawk a ni.