1317/2022-2023

Vawkhniahzawn thla ni 22, 2022: Vawiin khan Lawngtlai DC Conference Hall-ah Bawrhsap Pu Amol Srivastava hovin Lawngtlaia India ram zalenna ni champha phak, Independence Day 2022 hman dan tur rel a ni a. State sawrkar leh LADC hnuaia department official-te, District VC Association, District MJA leh tlawmngai pawl hrang hrang ai awhte, zirtirtu intel khawm pawl, Ex-Servicemen Association leh sports association ai awhte an tel.

Chairman Pu Amol Srivastava chuan kum 2022 hi India ramin zalenna a hmuh aṭanga a kum 75-na a nih angin sawrkar laipui pawhin a ngai pawimawh a, Azadi Ka Amrit Mahotsav (AKAM) hnuaiah hma lakna hrang hrang a kalpui tih sawiin, Lawngtlaiah urhsun leh khunkhan taka Independence Day hman a nih theih nan uluk taka ngaihtuahna seng turin kal khawmte chu a sawm a ni.

He hunah hian kum hmasa lama ram ni pawimawh hman ṭhin dan report ngaihthlak niin, kumin Independence Day atana Bawrhsap office-in ruahmanna an duan an chhawp chhuah chu thlir ho a ni a. Sports discipline ṭhenkhatin Independence Day 2022 puala inelna (tournament) buatsaih an dilna pawh thlir ho a ni bawk.

Meeting chuan kumin Independence Day lawmna hi Central YLA Playground-ah August ni 15, 2022 (Thawhṭanni) zing dar 8:30-ah hman ni se, tiin a rel a. Sikul naupang aṭanga parade contingent beisei a rem dawn leh dawn loh thu-ah chuan State lam thu ngaihchan ni se tih niin, Mizoram Police Armed Contingent aṭangin guard of honour erawh beisei a ni. 

Independence Day lawmna atana thil pawimawh hrang hrang bawhzuia hma la turin Technical Committee din a ni a. Department leh tlawmngai pawlte kovah mawhphurhna hrang hrang nghah a ni bawk.

Independence Day ni-ah hian sawrkar office, zirna in leh sawrkar quarters-ah te hnam puanzar zar vek tura tih a ni a. Lawngtlai khawpui chhunga damdawi in pathum - District Hospital Lawngtlai, Lairam Christian Medical Centre & Hospital leh Christian Hospital Lawngtlai te, chhawmdawlna in - Lairam Motherless Home te, District Jail te, Lairam Rescue Centre leh Gilead Drop-In Centre-ah te Independence Day pual ṭanpuina thilpek pek leh ni se, tih a ni bawk.

Kumin Independence Day lawmna puala tournament buatsaih diltu sports association pali - Lawngtlai District Football Association, District Volleyball Association Lawngtlai, Lawngtlai District Badminton Association leh Lawngtlai District Table Tennis Association te dilna chu Technical Committee meeting-a thlir ho leh atan dah a ni.

Attachment

  • Loading attachment...