1257/2024-2025

Dated Lawngtlai, 22nd July, 2024 : Vawiin khan DC Conference Hall, Lawngtlaiah Bawrhsap Pu Cheemala Siva Gopal Reddy (IAS) kaihhruaina hnuaiah Lawngtlaia India ram zalenna ni champha phak, Independence Day 2024 hman dan tur rela thutkhawm neih a ni.

Pu Cheemala Siva Gopal Reddy (IAS) chuan hun chep tak kara thutkhawm ngai pawimawha lo kal te hnena lawmthu sawina a nei a. India ramin zalenna a hmuh hi India khua leh tui tan chuan ni pawimawh tak a ni a, sawrkar laipui pawhin a ngai pawimawh hle tiin 'Viksit Bharat' (Developed India) hnuaiah hma lakna hrang hrang a kalpui a ni, a ti. Lawngtlaiah urhsun leh khunkhan taka Independence Day hman a nih theih nan mawhphurhna nei zawng zawngte uluk taka ngaihtuahna seng tur leh Lawngtlai mipuite pawh he ni ngaihlu a, a lawmna lama kal vek turin a sawm nghal a ni.

He hunah hian kum hmasa lama ram ni pawimawh hman thin dan report ngaihthlak niin, kumin Independence Day atana Bawrhsap office-in ruahmanna an duan an chhawp chhuah chu thlir ho niin, kumina Independence Day lawmdan tur an relho nghal.

Meeting chuan kumin Independence Day lawmna atan Central YLA Playground, Chandmari thlangin, August ni 15, 2024 (Ninga ni) zing dar 8:00 ah hman ni se, tiin a rel a. Khuallian tur atan hian State Protocol thuchhuak angin Pi Lalrinpuii, Minister, (Health & Family Welfare, etc) chu beisei a ni a. Sikul naupang atanga parade contingent beisei niin, Mizoram Police Armed Contingent atangin guard of honour beisei a ni bawk. Independence Day ni-ah hian sawrkar office, zirna in leh sawrkar quarters-ah te hnam puanzar zar vek tura tih a ni a. Lawngtlai khawpui chhunga damdawi in pathum – District Hospital Lawngtlai, Lairam Christian Medical Centre & Hospital leh Christian Hospital Lawngtlai te, chhawmdawlna in – Lairam Motherless Home te, District Jail te, Lairam Rescue Centre leh Gilead Drop-In Centre-ah te Independence Day pual tanpuina thilpek pek leh ni se, tih a ni bawk.

Independence Day lawmna atana thil pawimawh hrang hrang bawhzuia hma la turin 'Technical Committee' din a ni a, Pi B. Malsawmtluangi, Addl. DC, chu Chairperson niin, Pu H. Zonunmawia , Project Director, DRDO, chu Member Secretary nibawkin, Committee member-16 an awm a ni. Parade Sub- Committee din nibawkin, parade zir hun, parade endiktu ruat leh lawmman sem turte an kutah dah a ni. Medical Duty chunchang lo buaipui turin District Medical Superintendent ruat a ni a, power supply chu EE, P&E, Lawngtlai kutah dah a ni a. Rostrum leh Flag Post buaipui turin Superintendent of Police, Lawngtlai ruat niin, 'National Anthem' sa tur school ruat chu Technical Committee - kutah dah a ni.

Chief Executive Member (CEM) LADC chu Independence Day puala 'At Home Function' buatsaih tura beisei niin, function neihna tur hmun pawh a kuta dah a ni. Executive Secretary, LADC leh Department hrang hrang hotute chu 'Achievement Report' ni 5, August hma ngeia Deputy Commissioner Office- a thehlut tura tih niin, Independence Day puala pawisa thawh tura tih department - te a hun taka DC Office a thehlut tura tih a ni bawk. Kumin Independence Day lawmna pual hian tournament buatsaih nise tih niin, eng sport item ber nge buatsaih tur tih chu Techincal Committee meeting-a thlirho atan dah a ni.

Vawiin Independence Day 2024 hman dan tur relhona ah hian State sawrkar leh  LADC hnuaia department official-te, CYLA, LWA, MHIP, MUP, LUP,  District MJA ai awhte bakah Ex-Servicemen Association, District Sports Association leh Political Party ai awhte an tel a . Pi Margaret J. Vanlalremmawii (SDO, Sadar), chuan kalkhawmte hnena lawmthu sawina neiin thutkhawm hi a khar.