India Republic Day vawi 70-na pualin tukin khan Lawngtlai District Deputy Commissioner office tualah hun hman a ni.

Citizenship Amendment Bill, 2016 an duh loh lantir nana Central Young Lai Association (CYLA)-in Lawngtlaia Republic Day lawmna buatsaih tum an dodal hnuah, District Administration leh CYLA lam inbiak remna angin kum danga ropui taka lawm thin Republic Day chu DC office tualah hnam puanzar pawh pharh leh chibai buk chauhva hman tura rel a ni a. Chuti ang tak chuan tukin khan hun hman a ni ta a ni.

Lawngtlaia Republic Day pual hun hmanah hian Lawngtlaia state sawrkar hnuaia office hrang hrang hotu lute, Lawngtlai Police lam leh DC office staff-te an kal khawm a. Lawngtlai SP Pu Amit Goel IPS chuan zing dar 9:20-ah a hmun thlengin, general salute hmanga chibai buk a chhang let a. Zing dar 9:30-ah Lawngtlai Bawrhsap Pu N. Chakhai MCS chuan hun hmanna tur hmun thleng vein, hnam puanzar a pawt pharh a. India hnam hla rimawi tihrik a nih rualin hnam puanzar zahna chibai buk a ni a. Hemi zawh hian Republic Day puala hun hman chu tihtawp zui nghal a ni.

India Republic Day serh nan hian zing ni chhuah rualin Lawngtlaia sawrkar office leh quarters-ahte hnam puanzar zar a ni bawk.