No.3305/2021-2022

Pawltlak thla ni 7, 2021: Deputy Commissioner, Lawngtlai leh Lawngtlai District Football Association (LDFA) Futsal Committee te tang kawp huaihawt Inter-Departmental Futsal Tournament chu nizan atang khan Rorelliana Chinzah Futsal Ground, Lawngtlai Vengpuiah khelh tan a ni.

Futsal Tournament hawnna hun hi Futsal Committee Vice Chairman Pu T. Rohimliana'n kaihruaiin, Secretary Pu C. Lalhmachhuana hnen atangin report ngaihthlak a ni a. Lai Autonomous District Council (LADC)-a Chief Executive Member Pu V. Zirsanga leh Lawngtlai Bawrhsap Dr Andrew H. Vanlaldika te'n thu an sawi a. Futsal Committee Treasurer Pu Lalzuienga'n player-te intiamkamna neihtirin, Bawrhsap Dr Andrew H. Vanlaldika'n ball chhuihin tournament hi a hawng nghal a ni.

He Futsal Tournament hi Lawngtlaia state sawrkar leh LADC hnuaia department hrang hrangte'n inhmelhriatna leh thawh hona tha an neih zel theih nan leh hunpui boruaka mi harsa leh chhawmdawl ngaite puala buatsaih a ni a. Team 36 (state department team 25 leh LADC department team 11) telin, knockout-a khelh a ni dawn a. December ni 11, 2021 zanah final leh a kharna hun buatsaih tum a ni.