966/2024-2025

2024 Nikir thla ni 26: Khawvel pum huapa damdawi hman sual dona ni, "International Day Against Drug Abuse & Illicit Trafficking 2024" pualin vawiin khan Lawngtlai District Bawrhsap Pu Cheemala Siva Gopal Reddy ruahmannain Lawngtlaia ruihhlo ngaite enkawlna hmun pahnih, Gilead Drop-In Centre (GDC) leh Lairam Rescue Centre (LRC)-ah te ṭanpuina hlan a ni.

Ṭanpuina hlan tur hian District Bawrhsap hovin Lawngtlai SP bakah, DC Office, I&PR, Excise & Narcotics leh H&FW Department official-te chuan a hmunah an kal chilh a. Thawktute'n lo dawngsawngin, Social Welfare Department hnuaia Ruihhlo Do Fund aṭangin Gilead Drop-In Centre tan ₹ 5,000/- (cheng sang nga) leh Lairam Rescue Centre tan ₹ 10,000/- (cheng sing khat) chu thawktute kutah an hlan a ni.

Gilead Drop-In Centre hi MHIP Lawngtlai Core Composite hnuaia kalpui niin, harsatna khirh khan zawk leh natna ṭha lo laka ruihhlo ngaite leh inzuar ṭhinte an him theih nan leh rilru leh taksaa damna an chan theih nan hma lakna kalpui a ni a. Tunah hian GDC-a inziak lut IDU (damdawia inchiu ṭhin) mi 487 leh FSW (hmeichhe inzuar ṭhin) mi 79 an awm mek a. A khat tawkin an thisen leh an hriselna dinhmun endiksak ṭhin an ni a. GDC kal tlang hian HIV positive hmuh chhuah IDU 106 leh FSW 18 awm tawhin, tunah hian HIV postive IDU 82 leh FSW 15 an awm mek a ni.

Lairam Rescue Centre hi Lairam Isua Krista Baptist Kohhran (LIKBK) hma lakna peng pakhat, Lairam Social Mission hnuaiah kum 2021 November ni 12 khan din niin, kum 2022 February ni 11 aṭangin ruihhlo ngaite an enkawl ṭan a. Thawktu mi 11 awmin, tun dinhmunah hian enkawl lai mi 12 an nei a. Mi pakhat hi thla thum chhung enkawl ṭhinin, a din tirh aṭangin mi 131 an enkawl tawh a. Khum 30 awm theihna tur building thar luah lut turin an inbuatsaih mek a ni.

Attachment

  • Loading attachment...