No.7727/2020-2021

Lawngtlai, Vau thla ni 8, 2021: Vawiin March ni 8 hi International Women's Day a ni a. Lawngtlaiah chuan One Stop Centre leh DAY-NULM tang kawp huaihawtin DC Conference Hall-ah Bawrhsap Dr Andrew H. Vanlaldika hovin hman a ni.

Dr Andrew H. Vanlaldika chuan tun hmain khawvel hmun hrang hrangah hmeichhiate chu dinhmun chhia leh hnuaihnung zawka ngaihna a awm thin a, hnam thenkhatah phei chuan bungraw chi khat ang leka ngaihna te pawh a awm thin tih sawiin, hmeichhe huaisente avangin tun dinhmunah erawh hmeichhe dinhmun chuan hma a sawn tawh hle, tih a sawi a. Khawvel hmun hrang hrang leh Mizoram ngei pawh thlirin, mipa tam takin an tluk loh hmeichhe ngaihsanawm leh entawn tlak tam tak an awm tih sawiin, kawng tam takah hmeichhiate chuan chungnung zawk leh hmahruaitu nihna pawh an nei tawh a ni, a ti. Hmeichhiate chuan hnam leh khawtlang tihdanphung kalh si lova hna leh khawtlang nuna hmasawn dan an thiam a pawimawh thu sawiin, chet velna hrang hrangah hmeichhiate'n thil ho tham te pawh mipa tih tura dah kan ngah lutuk chuan, rilru lamah mipa tluk lova inhriatna a bo thei dawn lo va, mipa tih theih ang chu tih theih ve tum tlat turin rilru tihpaukhauh a tul a ni, a ti a. Khawvela zirna in hmasa ber, 'chhungkua'-a zirtirtu hmasa ber chu 'nute' an nih angin, ram leh khawtlang hmasawn nana an pawimawhna hria a, tihlawhtling zel turin International Women's Day lawmnaa kal khawm hmeichhiate chu a chah a ni.

He hun hi Lawngtlai DC office-a Superintendent Pi Malsawmtluangi'n a kaihruai a. Hmeichhe harsatna tawkte enkawl lailawkna, One Stop Centre-a District Centre Administrator Pi J. Lalremkimi; hmeichhe chenna in nei lote tana khawsakna siamsaktu, Swadhar Greh-a Superintendent Pi Rebek Laldawmdingi; hmeichhiate hamthatna tur scheme hrang hrang buaipuitu, Mahila Shakti Kendra (MSK)-a District Coordinator Pi B. Lalruatchhungi leh DAY-NULM District Manager Pi VL Ramnunsangi te bakah, Mizo Hmeichhe Insuihkhawm Pawl Sub-Headquarters Lawngtlai leh Lai Women's Association General Headquarters Lawngtlai ai awhte hnen atangin thu sawi ngaihthlak a ni a. UD&PA Lawngtlai District Project Officer/SDO(Sadar) Pu V. Lalruatliana'n lawm thu sawiin hun a khar a ni.

Vawiina Lawngtlaia International Women's Day hmannaah hian MHIP Sub-Headquarters, Lawngtlai hruaitute leh member-te, LWA General Headquarters, Lawngtlai hruaitute leh member-te, NULM hnuaia Self Help Group-te bakah, OSC, Swadhar Greh, MSK leh DAY-NULM hnuaia thawktute an tel a ni.

International Women's Day hi hmeichhiate dinhmun chawisanna leh an dikna chanvo inzirtir thar nan United Nations Organisation (UNO) bul tumin kum 1977 atang khan khawvel pumah hman tan a ni a. Kum tin March ni 8-ah hman thin a ni.