No.5119/2020-2021

Lawngtlai, Mimkut thla ni 15, 2020: Vawiin khan Information & Public Relations (I&PR), Lawngtlai District leh Mizoram Journalists' Association (MJA), Lawngtlai District tang kawp huaihawtin Lawngtlai Press Club-ah "Workshop on Journalism and Social Media" buatsaih a ni.

He hun hi Lawngtlai Bawrhsap Dr Andrew H. Vanlaldika, MCS chuan hmanpuiin, journalist leh social media lama mi tangkai tak takte chu, an sukthlekin mipui a hruai nasat avangin kawng hrang hrangah an pawimawh hle tih a sawi a. Chumi a nih avang chuan thu theh darh kawngah pawh an fimkhur a tul hle a ni, a ti. Chanchinbu leh social media-a thu lengvak zingah sawrkarin a bawhzui tur ang chi chu an ngaihven reng thu sawiin, thil hriat chian loh a awm chuan social media-a theh darh nghal mai lo va, thawktute leh a hre chiang turte zawh fiah hmasak thin ni se tha a tih thu a sawi.

Lawngtlai District MJA President Pu Lalngheta Ralte pawhin thu sawiin, journalist leh social media hmanga thu thar theh darhtute inkara khi chat awm lek lek thin chu thil inman fuh tawk loh vang a nih thu a sawi a. Chanchin thar theh darh kawngah chanchinbu emaw social media emaw hmanga thu rin tlak mumal lo theh darh thinte chuan mi rin an hlawh zui ngai lo tih sawiin, thu theh darh kawngah fimkhur luata thu dik puan that ngam loh a hlauhthawnawm rualin, fimkhur loh luat vanga dan bawhchhiat pawh a hlauhawm a, mipuite kawng dika hruai turin tan lak a ngai a ni, a ti.

Vawiina Journalism and Social Media Workshop hi Lawngtlai District MJA Vice President Pu Elvis Lalthangzuala'n kaihruaiin, resource person pahnih - Lawngtlai District Court-a Assistant Public Prosecutor Pi Zirthantluangi leh Lawngtlai District Information & Public Relations Officer Pu C. Lalhruaitluanga te'n cyber crime leh social media kaihhnawih dan chi hrang hrang te, journalism leh social media chungchanga thil pawimawh hrang hrang an sawi a. He huna tel Lawngtlai District MJA member-te bakah, Lawngtlaia political party hrang hrang leh tlawmngai pawla media lam khawihtute leh mimala social media hmanga chanchin thar leh thu pawimawh dang theh darh thinte nen sawi hona hun hman a ni bawk.