Vawiin khan Lawngtlai District Level Fire Prevention Committee (DLFPC) chu an Chairman, Lawngtlai DC Dr A. Muthamma IAS hovin a office chamber-ah an thu khawm a. Kangmei ven kawnga hma lak dan tur hrang hrang an sawi ho.

He hunah hian DLFPC Member Secretary, Lawngtlai DCF Pu Lalchhandama hnen atangin kum hmasa lama hma lak dan report ngaihthlak a ni a. Kumina hma lakna tur hrang hrang zingah, Fire Prevention Week 2017 hawnna chu February ni 6-ah DC Conference Hall-ah neih ni se, tih a ni a. Ram kang tur ven nana mei dai phiah te, lo hal theih hun chhung bi tuk leh khaw tina kala kangmei ven chungchang zirtirna buatsaih te tha tih a ni a. Awareness Campaign Sub-Committee pawh siam nghal a ni.

He thut khawmah hian a zau thei ang berin kangmei ven chungchang zirtirna theh darh ni se, tih a ni a. District Level Fire Prevention Award dawng thei ngei tura hma lak leh kangmei ven kawnga thawk tha khua chawimawina siam leh tum a ni a. Kangmei chhuak thelhnaa nunna chan an awm chuan zangnadawmna ngaihtuahsak tur a rel a ni bawk.