1352/2022-2023
Vawkhniahzawn thla ni 26, 2022: Lai Autonomous District Council (LADC) hnuaia village council (VC) pangaa by-election buatsaih tura hman tur draft electoral roll chu vawiin khan Lawngtlai District Election Officer, Lawngtlai Bawrhsap Pu Amol Srivastava chuan Lawngtlai DC Conference Hall-ah a tlangzarh a. Draft electoral roll hi political party ai awhte hnenah a hlan nghal.
He hunah hian Election Officer Pi B. Malsawmtluangi bakah, Assistant Electoral Registration Officer-te, political party leh tlawmngai pawl ai awhte an tel a. By-election atana inbuatsaihna kalpui dan tur leh thil pawimawhte sawi ho nghal a ni.
LADC hnuaia VC by-election neih turah hian 11-Ngengpuikai, 47-Dumzautlang leh 57-Vaṭhuampui VC Constituency-ahte general seat pakhat ṭheuh hnawh khah tur a awm a; 46-Hmawngbuchhuah leh 48-Laitlang VC Constituency-ahte general seat pathum ve ve leh reserve seat pakhat ve ve hnawh khah tur a awm thung.
Draft electoral roll aṭanga a lan danin, Ngengpuikaiah vote nei mi 521 (mipa 268 leh hmeichhia 253), Hmawngbuchhuahah vote nei mi 208 (mipa 95 leh hmeichhia 113), Dumzautlangah vote nei mi 151 (mipa 86 leh hmeichhia 65), Laitlangah vote nei mi 141 (mipa 78 leh hmeichhia 63) leh Vaṭhuampuiah vote nei mi 826 (mipa 437 leh hmeichhia 389) an awm a ni.
He'ng VC by-election neihna tura draft electoral roll-ah hian siam ṭhat duh nei tan July ni 31, 2022 thleng siam ṭhat theihna hun hawn a ni a. August ni 8, 2022-ah final electoral roll chu tar chhuah tura ruahman niin, inthlan hun tur erawh puan a la ni lo.
Attachment
- Loading attachment...
