No.3302/2020-2020

Lawngtlai, Vawkhniahzawn thla ni 21, 2020: Vawiin khan Lawngtlai District Task Force & Committee on Malaria Elimination (DTFCME) chu an Chairman, Bawrhsap Dr Andrew H. Vanlaldika, MCS hovin Lawngtlai DC Conference Hall-ah an thu khawm.

Chairman Dr Andrew H. Vanlaldika chuan malaria chu natna hluar tak, fimkhur erawh chuan vei lo tura inven theih a nih thu sawiin, um bo tura sawrkar hma lakna a hlawhtlin theih nan pawl hrang hrang tan rual a, mipuite pawhin thu awih a tul tih a sawi a. July atanga September thla chhung hi a tam lai a nih avangin fimkhur zual a, thosilen zar that te, thosi hlo kahtir leh a keu theihna tui tling tihbo te chu ngaih pawimawh leh zual a tul a ni, a ti.

DTFCME Co-Chairman, Lawngtlai Chief Medical Officer Dr Lalthlamuana chuan DTFCME chungchang a sawi fiah a. Intensified Malaria Elimination Project (IMEP) hnuaiah kum 2016 February thla atangin India ram ata malaria um bo turin hma lak tan a nih thu sawiin, kum 2030-ah chuan um bo theih tawh ngei tum a ni, a ti.

Vector Borne Disease Control Programme (VBDCP) hnuaia Lawngtlai District Consultant Pu C. Khaipotha chuan powerpoint presentation hmangin malaria um bo tura beihpui tthlak chungchang leh Lawngtlai District dinhmun te a sawi fiah a. District-a thawktute'n theih tawpa hma an la chunga harsatna hrang hrang awmte tar lan niin, malaria um bo a nih theih nana sawrkar department dangte leh VC leh tlawmngai pawlte nena thawh ho theihna tur kawng hrang hrangte sawi ho a ni.

Malaria vei tam dan azirin category pali - Category 0-3 a awm a. Hemiah hian Lawngtlai District chu a sang ber category (Category 3)-ah awm mekin, kum khatah mi 1000 zelah mi 11.4-in malaria vei ang a la ni. Thawktute report atanga a lan danin, Lawngtlai District-a malaria case hmuh chhuah zawng zawng 60% chu lo lama hna thawk mi an ni.

Lawngtlai District-ah hian kum 2016-ah malaria case 2573 hmuh chhuah niin, mi 2-in an thihpui a; kum 2017-ah case 2902 hmuh chhuah niin, mi 3-in an thihpui a; kum 2018-ah case 2280 hmuh chhuah niin, mi 1-in a thihpui a; kum 2019-ah case 4119 hmuh chhuah niin, mi 4-in an thihpui a; kum 2020 June thla thlengin case 2014 hmuh chhuah tawh niin, mi 4-in an thihpui tawh a ni.

Malaria um bo tura Lawngtlai District VBDCP-in hma a laknaah thosi hlo kah, thosilen sem leh thosi tihremna tur ngaihtuah te chu hma lakna langsar a ni a. Khaw hrang hrangah mipui zirtirna kalpui niin, kumin chhungin khaw 30-ah mass screening cum awareness huaihawt tawh a ni a. Hetah hian khawsik leh khawsik lo pawh, khaw chhunga awm tawh phawt an thisen test vek a ni.