3891/2023-2024

Lawngtlai dated 20th February 2024: Vawiin chawhma khan DC Conferenec Hall, Lawngtlaiah ‘Mizoram State Day 2024’ lawmna hun hman a ni a. Pi Margaret J Vanlalremmawii, SDO(S) chuan hun kaihruaiin Pu Abraham Beirazi Khithie, Addl. DC chuan khuallian niin a hmanpui a ni.

Addl. DC Pu Abraham Beirazi Khithie chuan MNF leh Sawrkar laipui inremsiamna avang a Peace Accord siam a nih dan te sawiin State dinhmuh luah tur a Mizoram mipui tawrhna te, huaisenna leh inpeknate chuan thangtharte thinlungah ram leh hnam hmangaihna pian chhuah tir zel tura a duh thu a sawi a. Kum 20 chuang rahbehna hnuai a awm tawh kan nih avangin zalenna leh ralmuanna hlutzia hrechiangtu kan nih theuh thu Pu Abraham-a chuan sawiin ram thenawm a buaina avanga thlamuanna rawn zawng a kan State bel a raltlan rawn lutte tuamhlawm thei a kan awm hi a ropui a tih thu a sawi bawk a ni.

State dinhmun kan luah hnu a Lawngtlai district pawhin hmasawnna hmel thar thahnem tak a hmuh thu khuallian chuan tarlangin heng hmasawnna ruangam te hi tangkai tak a hmangtu ni turin leh hlawhtlin puitu nih tum theuh turin kalkhawmte a chah a. Mipui harsatna sutkian kawng a kaihruaitu leh hmasawnna kawng kawhhmuhtu nih tum tlat turin Lawngtlai district chhung a Sawrkar pisa a thawktute chu a fuih bawk a ni.

Pu H.Lalliantluanga, President, MUP chuan State ralmuang leh hmasawn ni chhunzawm zel tur a mipui leh sawrkar a fawng chelhtute inkarah thawh hona leh tanrualna tha a awm a pawimawh thu a sawi a. Pu K.Hre kung, MDC pawhin State dinhmun luah thei tur a ram tan a mi thahnemngaite inpekna hrereng chung a ram leh hnam hmangaih nachang hriat a pawimawh thu a sawi bawk a ni.

Lawngtlai District-a Mizoram State Day 2024 lawmna hun ah hian Lawngtlai khawpui chhung a Sawrkar office hrang hranga hotute leh tlawmngai pawl hruaitute an tel a ni.