Vawiin (26.07.2016) chawhma dar 11:30 khan Lawngtlai DC Conference Hall-ah Mizoram State Rural Livelihood Mission (MzSRLM) hawnna neih a ni a. Rural Development Secretary Pu Lalhmingthanga IAS chu Khuallian niin, Lai Automomous District Council-a Executive Member Pu Laltlawmlova Chinzah chu Khual Zahawm a ni.
Khuallian Pu Lalhmingthanga chuan SRLM chu hmeichhe khawsak harsa zual chhanchhuahna tura sawrkar laipui hma lakna pawimawh tak a nih thu sawiin, Self Help Group kal tlanga he hna hi kalpui tur a nih thu a sawi a. Lawngtlai District chhungah chuan Sangau RD Block-ah he programme hi kalpui tum a nih thu sawiin, he Block chhunga hmeichhe khawsak harsa, thil ti tak tak duh mite'n an hman tangkai ngei a rin thu a sawi a ni.
Khuallian chuan Mizoram chu sawrkar hma lakna pakhat, ni za inhlawhna kan tih mai MGNREGS kalpui kawngah India ram chhunga a ti tha ber dawttu a nih thu a sawi bawk.
Khual zahawm Pu Laltlawmlova Chinzah chuan he programme hi a hlawhtlin theihna tur chuan rinawm leh teirei peih a ngaih thu sawiin, Sangau RD Block chhung mipuite chu an vannei hle a ni, a ti. Lawngtlai DRDA Project Director Pu H.Dolianbuaia kaihhruai SRLM hawnnaah hian Lawngtlai DC Dr A. Muthamma pawhin Lawngtlai District chhung Sangau RD Block-a SRLM Scheme kalpui a ni tur chu lawmawm a tih thu a sawi a. Sangau RD Block BDO Pu Vanlaltanpuia'n lawm thu sawiin, a tawp a khar a ni.
SRLM hawnnaah hian LADC hnuaia EM leh MDC eng emaw zat bakah, Lawngtlai District-a sawrkar department hrang hrang hotute, Lawngtlai khawpui chhung leh Sangau RD Block atangin VCP, VC member, LWA leh MHIP hruaitute leh Lawngtlaia chanchinbu mite an tel a ni.
