Vawiin khan Lawngtlai District Level Co-ordination Committee on NDD chu an Chairman, Lawngtlai Bawrhsap Pu N. Chakhai MCS hovin a pisaah an ṭhu khawm a, National Deworming Day (NDD) 2019 hman dan tur an sawi ho.

National Deworming Day hi February ni 8, 2019-a hman tur niin, naupang kum 1 aṭanga kum 19 inkarte chu rulhut hlo (Tab. Albendazole) eitir vek tur a ni a. Lawngtlai District chhung hmun hrang hranga zirna in leh anganwadi centre mai bakah, he'nga kal lo naupang dangte pawh tuam vek turin ruahman a ni.

He ṭhut khawmah hian Lawngtlai District Immunisation Officer Dr S. Thaizi chuan rulhut chuan ek tui, pum puar, chaw ei tui lo leh chauhna te a thlen thei a, naupang ṭhan chhohna kawngah harsatna lian tak a thlen thei bawk tih sawiin, naupang hrisel nan rulhut hlo ei (deworming) chu a pawimawh hle a ni, a ti a. NDD-a rulhut hlo sem ṭhin Albendazole chu a hlauhawm lovin, eng nen mah a inhal lo va, thla tin ei pawha pawi tur eng mah a awm loh thu tar lan a ni. 

He hunah hian February ni 8, 2019 NDD hmanna pui ber chu Govt Model English School-ah chawhma dar 11-ah Bawrhsap hova hman rel a ni a. Hetah hian rulhut hlo ei pawimawhzia inzirtir pahin, zirlaite chu rulhut hlo eitir nghal an ni ang a. Hemi rual hian district chhung sikul leh anganwadi centre hrang hrangah naupangte chu rulhut hlo hi eitir ve nghal an ni bawk ang. Anganwadi centre emaw, sikul emawa kal lote chu ASHA-te'n an tlawh chhuak ang a, hemi nia pek hman loh an awm chuan February ni 14-ah pek leh an ni ang.

Rulhut hlo chungchanga mipuite hriat tur pawimawh puanzar leh hrilhfiah nan Cable TV Talk Show buatsaih remtih niin, naupangte'n rulhut hlo hi tha taka an ei theih nan vil zui tur thawktu lam ruat an ni bawk.

He thut khawmah hian health lama thawktu dangte bakah, education lam leh social welfare lam atangin ai awh an tel a ni.