No.7669/2020-2021

Mizoram Handloom & Handicrafts Development Corporation Ltd (ZOHANDCO)-in  Dokulha Hall, Lawngtlaia ni thum awh tur "National Handloom Expo 2021" an buatsaih chu vawiin chawhma khan Lai Autonomous District Council (LADC)-a Chief Executive Member (CEM) Pu Manghmung Chinzah chuan a hawng.

ZOHANDCO Chairman Pu C. Lalrammawia kaihhruai National Handloom Expo 2021 hawnna inkhawmah hian Khuallian Pu Manghmung Chinzah chuan hnam ziarang humhimna kawngah ZOHANDCO hma lakna chu chhuanawm a tih thu sawiin, Lawngtlaia National Handloom Expo an rawn buatsaih chu lawmawm a tih thu a sawi a. Zo hnahthlak hnam hrang hrangin hnam ziarang leh tihdan hrang hrang kan neihte chu Mizo kan nihnaa min phuar khawmtu a nih zel theih nan leh inpumkhatna tha kan neih zel theih nan hnam thuam leh thiamthil chawi lar chu thil pawimawh tak a ni tiin, Handloom Expo chu mipuiin man tlawm zawka hnam thuam an lei theihna tur a nih piah lamah, hnam ziarang chawi larna tha tak a ni dawn a ni, a ti.

ZOHANDCO Chairman Pu C. Lalrammawia chuan sawrkarin a tulna leh pawimawhna a hriat avangin ZOHANDCO chu din thar lehin, hma lam panin chak takin a kal mek a ni, a ti a. Lawngtlaiah pawh Handloom Expo mai ni lo, hma lakna lian zawk kalpui tura ruahmanna a la awm thu a sawi.

Lawngtlaia National Handloom Expo 2021 hawnna hi Lawngtlai Bawrhsap Dr Andrew H. Vanlaldika pawhin hmanpuiin, Khuallian CEM hi LADC-a member leh official eng emaw zatin an tawiawm bawk.

March ni 1 atanga ni 3, 2021 chhung awh tur National Handloom Expo-ah hian dawr 25 chuang hawn niin, he'ng dawrahte hian tualchhuak puan leh thawmhnaw lam bakah, kut themthiamna lam thil siamte man tlawm zawkin zawrh chhuah a ni.