No.3612/2021-2022
Aizawl Pawlkut thla ni 10, 2022: Vawiin khan Lawngtlai Additional Deputy Commissioner Pu James Miahlung hovin a office chamber-ah Lawngtlai District chhunga naupangte himna leh hamthatna chungchang ngaihtuah ho a ni a. District Child Protection Officer, Child Development Project Officer, Additional Superintendent of Police, District Information & Public Relations Officer leh Lawngtlai District Village Council Association President te an tel.

National Commission for Protection of Child Rights (NCPCR)-in kum 2020-a Standard Operating Procedure (SOP) 2.0 a tihchhuah anga khawlaia naupang khawsate zawng chhuak a, anmahni chhan chhuahna leh enkawlna kawnga hma la zui tura Supreme Court-in state leh union territory-te a hriattir tawh angin, Lawngtlai District chhungah pawh hma lak nghal ni se, tih a ni a. Lawngtlai District chhungah naupang chawmtu nei lo mahnia khawlaia khawsa emaw, khawsakna in nei tho chunga chhun lama vakrawlai mai mai emaw, chhungkuaa khawlaia khawsa emaw an awm leh awm loh zir chiang turin DCPO leh CDPO te'n VC leh tlawmngai pawlte thawhpuiin hma lo la se, January ni 14 hmain report theh luh ni se tih niin, an thil hmuh chhuah azirin hma lak zui tur a ni ang.

He hunah hian naupangte hamthat nana hma latu pawl, Every Infant Matters te'n Lawngtlai District chhunga COVID-19 vanga thi te chhungkuaah pawl 6 atanga pawl 12 zirlai naupang emaw, medical/engineering zirlai emaw an awm chuan anmahni chhawmdawl tura hma lak an inhuam thu pawh tar lan a ni a. Chhawmdawlna dawng thei tur inzawng chhuak tura hma lak ni se tih niin, chhawmdawlna dawng thei tur an awm chuan Every Infant Matters te hian smartphone leisakin, data pack thunna tur Rs 2,500/- an pek bakah, kum khat chhung atan ration leh stationery te an tumsak dawn a ni.