Vawiin kha ‘Naupangte Ni’ (Children’s Day) a ni a. Lawngtlai District Child Protection Unit (DCPU) chuan he ni lawmna hi Lawngtlai-III-a Central YLA Hall-ah an buatsaih.

He hunah hian Lawngtlai DCPO Pi Mary Lalremruati chuan kal khawmte lawmna thu leh hun hman chhan tlangpui a sawi a. Khuallian LADC Executive Secretary Pu H. Lalramenga pawhin thu sawiin, naupangte chu ram hmakhua tur an nih avangin uluk taka enkawla ngaihsak an phu a, an puala hun buatsaih fo chu thil tha leh pawimawh tak a ni, a ti.

He hun hi naupang pual a nih angin naupangte’n hlim taka hun an hman theih nan leh an thiam thilte an pho lan theihna tur hun remchang atana ruahman a ni a. V. Lalawmpuii (Southern Standard Middle School), Dorothy Lalneihpuii (Downtown English School), Esther Lalremruati (GRHSS) leh Lizzy Malsawmsangi (Govt Model English School) te hnen atanga zai ngaihthlak a nih bakah, Downtown English School leh Ngurnunsangi English School naupangte hnen atangin rimawi tum ngaihthlak a ni a. Don Bosco School, Downtown English School leh Govt Southern Public High School te’n hnam lam an entir bawk. He hunah hian LPS Comedian Search 2017-a pakhatna Francis Lalzamlova chu chah chhuah niin, fiamthu hmangin kal khawmte a chawk hlim a ni.

Vawiina ‘Naupangte Ni’ hmannaah hian Lawngtlai DCPU te’n naupang humhalh leh venhimna kawnga hma an lak tawhna leh an programme buatsaih tawhte hlimthla chu en theih turin pho chhuah a ni bawk.