317/2022-2023
Ṭau thla ni 27, 2022: Vawiin khan Lawngtlai Horticulture Division leh Lawngtlai Florist Association (LFA) te ṭang kawp buatsaih Horticulture Exhibition 2022 chu LADC Conference Hall-ah Lawngtlai Bawrhsap Dr Andrew H. Vanlaldika'n a hawng.
Dr Andrew H. Vanlaldika chuan Horticulture department leh LFA te'n exhibition an buatsaih chu lawmawm a tih thu sawiin, a tui mite incho phur tawnna tur leh thawh rim inzirtirna ṭha tak a nih a beisei thu a sawi a. Pangpar chin leh huan siam chu ei zawnna ṭha tak a nih rualin Lawngtlai District chungah hmasawnna tur leh hmabak tam tak a la awm tih sawiin, awmze neia hma la a, hmun dang aṭanga thei, thlai leh pangpar lak luh ngai lova Lawngtlai District intodelh nana ṭan la turin pangpar chingtu leh huan siamtu kal khawmte chu a chah a ni.
He Horticulture Exhibition hawnna hun hi District Horticulture Officer Pu C. Ramrela'n kaihruaiin, kal khawmte lawmna thu a sawi a. Baptist Church of Mizoram Lawngtlai North Pastor Bial bialtu pastor Rev. H. Lalremtluanga chuan hunserh a hmang a. Lawngtlai Florist Association (LFA) President Pi Zodinpuii Fanchun chuan LFA report leh pangpar chingtute fuihna thu a sawi a. Chief Judge, Pu Andrew Lalthawmliana, PICCOA Lawngtlai chuan thil pho chhuahte an endik dan a sawi bawk.
Tun hi Lawngtlai Horticulture Division leh Lawngtlai Florist Association te'n exhibition an buatsaih vawi lina a ni a. Kum 2017, 2018 leh 2020-ah te khan hlawhtling takin exhibition hi an lo buatsaih tawh a ni. Tun ṭumah hian pangpar chi hrang hrang 17 pho chhuah niin, mi 40-in an rawn entir a. Kut hna thawktu 20 te'n thei leh thlai chi hrang hrang chi 9 an rawn ken khawmte pho chhuah a ni bawk.
He exhibition hi ni hnih awh tur niin, exhibition neih chhung hian a duh apiang tan tlawh theih a nih bakah, thei leh thlai hrisel leh tuihnai tak tak leh pangpar mawi tak tak lei tur a awm dawn a. Vawiin tlai dar 3 thleng khan mi 150 chuangin an tlawh tawh a. Naktuk April ni 28, 2022 khian khar tur niin, a kharna hunah hian lawmman te pawh sem a ni ang.
Attachment
- Loading attachment...
