No.4007/2020-2021

Lawngtlai, Thlazing ni 11, 2020: Vawiin khan Lawngtlai District Legal Services Authority (DLSA) chuan Lawngtlai DC Conference Hall-ah The Mizoram Victims of Crime Compensation Scheme, 2011 atangin pawi khawihna tuartute zangnadawmna an sem.

He hun hi Lawngtlai Bawrhsap Dr Andrew H. Vanlaldika chuan hmanpuiin, vanduaina tawkte a tuarpui thu a sawi a. Zangnadawmna chuan an rilru hrehawm leh na te chhawk thei vek lo mah se, sawrkarin an vanduaina tawh chu a hriatpui tih lantirna a ni tiin, Pathianah chauh thlamuanna famkim a awm tih hria a, chu chu en fo turin a chah.

Vawiin hun hi Chief Judicial Magistrate, Lawngtlai DLSA Member Secretary ni bawk Pu BT Lala Sakachep chuan a kaihruai a. Advocate Pu ST Ramhmachhuanmawia'n pawi khawihna tuartu zangnadawmna dawn theih dan (scope of victims of crime compensation scheme) sawiin, Lawngtlai One Stop Centre-a District Centre Administrator Pi J. Lalremkimi'n hmeichhiate chunga pawi khawihna thleng thinte (introduction to women victims of crime) a sawi zau va, Advocate Pu C. Lalrinfela'n zangnadawmna sem hi a buaipui thung a ni.

Vawiina zangnadawmna pek takte hi pawi khawihna tuartu, Lawngtlai District chhunga mi, mi paruk niin, zangnadawmna atan hian Rs nuai 26.5 sem chhuah a ni a. Lawngtlai DLSA kal tlang hian kum 2018 December thla khan mi panga hnenah zangnadawmna Rs nuai 16 sem a lo ni tawh bawk a ni.