Vawiin khan Lawngtlai Bawrhsap office chamber-ah PCCF (Wildlife)/Chief Wildlife Warden Pu Rosiama Vanchhawng hovin Mizoram sawrkarin LADC huam chhunga ramngaw (protected area) a enkawlte LADC kuta hlan let dan tur sawi ho a ni.

He meeting-ah hian Lawngtlai Bawrhsap Dr Arun T., IAS bakah, LADC Deputy Secretary Pu LZ Tluanga, DCF(WL) Pu PC Lalchhandama, LADC DCCF Pu K. Lalromawia leh MADC DCCF Pu Thaly T. Azyu te an tel a. Mizoram sawrkar forest department-in LADC huam chhunga Phawngpui National Park leh Ngengpui Wildlife Sanctuary a enkawl mekte kumin September thlaa LADC kuta hlan let tur chungchang leh hma lak dan turte an sawi ho va. He’ng protected area-te hi kum 1983 khan Mizoram sawrkar leh LADC inremsiamna angin Mizoram sawrkar chuan kum 25 chhung atan a enkawl tan a. Kum 2008 khan he inremsiamna hi kum 10 chhung atan pawh sei leh niin, kumin September atang hi chuan LADC kuta hlan let leh tawh tura ruahman a ni a. Hemi atana thil tul hrang hrang leh inbuatsaih leh inhmakhua ngai thilte chu vawiin meeting-ah hian sawi ho a ni.

Hei bakah hian March ni 13, 2017 atanga Lungzarhtum Tlangpui hmuna ramsial chhuak, tun thlenga bawngrual zinga la khawsa mek chungchang leh a buaipui zui dan tur pawh an sawi ho va. Wildlife lam hotute chuan an record neih saah a anpui dang an hmuh loh avangin he ramsial hi eng chi ber nge a nih hriat chian theih a la nih loh thu an sawi a. A ek atanga DNA test an tih tawh thu leh a chi dik tak hre chiang thei tur chuan a thisen atanga DNA test hi tih a ngaih thu sawiin, hei hi an la tih theih rih loh thu an sawi. State leh district council forest department lam chuan AH&Vety department te nen pawh inrawn tlangin ramsial hi an buaipui reng thu an sawi a. He ramsial hian khaw mipui leh zin veivakte tan pawh harsatna lian tham a thlen lohna tur te, amah ramsial ngei paw’n mihring kut a tuar lohna tur tea venhimna kalpui dan tur leh a enkawl zuina kawnga hma lak dan tur te he meeting-ah hian sawi ho a ni bawk.

Meeting zawh hian PCCF(WL)/CWW Pu Rosiama Vanchhawng chuan LADC Forest office leh Chhimtuipui Wildlife Division office te tlawhin, Ngengpui Wildlife Sanctuary tlawh turin Ngengpui lam a pan leh nghal a ni.

Attachment

  • Loading attachment...