No.6561/2020-2021

Lawngtlai, Sahmulphah thla ni 16, 2020: Vawiin khan Lawngtlai DC Conference Hall-ah Bawrhsap Dr Andrew H. Vanlaldika hovin Lawngtlai District Water & Sanitation Mission (DWSM) hnuaia Lawngtlai District chhunga plastic (lawngbarh lam chi) khawn khawm a, hman tangkai theih tura hralh chhuah lehna hmun 'Plastic Waste Collection Centre' (PWCC) din dan tur leh a din nana thil pawimawh hrang hrangte sawi ho a ni.

Chairman, Dr Andrew H. Vanlaldika chuan chhehvel boruak (environment) hrisel leh thianghlim neih theih nan plastic thehthang dan him leh felfai ruahman a tul thu sawiin, DWSM hnuaia PWCC din tura hma lakna chu District tan hmasawnna rahbi pawimawh tak tur a nih thu a sawi a. DWSM hnuaia hma lak theih piah lama a kaihhnawih department dangte nen tang ruala hma lak ho a tulna kawngah department dangte thawhpuina a ngen nghal a ni.

PHED Lawngtlai WATSAN Division-a Sub-Divisional Officer Er T. Mangliandinga chuan PWCC din tulna leh pawimawhna sawi fiahin, a din nana mamawh hrang hrang awmte a sawi fiah a. Hma lak dan tura rawtna hrang hrangte sawi ho nghal a ni.

PWCC hi din theih a nih chuan, plastic hnawmhnawk, thil danga la hman tangkai theih site chu la khawmin, PWCC-ah hian hralh theiha sawngbawl a nih hnuah hman nawn tura sawngbawl theitute hnenah hralh chhawn leh thin a ni dawn a ni. PWCC-ah hian plastic hnawmhnawk chhek khawlna hmun (storage of plastic waste), a thliar hranna hmun (segregation facility), a tel khawmna khawl leh a dahna in (plastic baling machine & building), kawlphetha pekna (power supply) leh lirthei dahna hmun (vehicle parking) te a awm a tul dawn a. Ram metre 1500 bial (1500 sqm) vel mamawh tura chhut a ni.

Hemi atana mamawh ram chu Lai Autonomous District Council (LADC)-ah dil ni se, tih a ni a. Thil tul dang bawhzui chu PHE Department kutah dah a ni.