3469/2022-2023

Ramtuk thla ni 3, 2023: Vawiin khan Lawngtlai District Level Grievances Redressal and Monitoring Committee (DLGR&MC) under PM-KISAN chu an Chairman, Lawngtlai Bawrhsap Pu Amol Srivastava hovin Lawngtlai DC Conference Hall-ah an ṭhu khawm.

Sawrkar Laipui ruahmannaa kut hna thawktute ṭanpuina PM-KISAN (Pradhan Mantri Kisan Samman Nidhi) hi kum 2019 aṭang khan Mizoramah kalpui a ni a. He scheme hnuaia inziak lut, kut hna thawktu, ram nei ngeite chu kum tin bank kal tlangin ṭanpuina ₹ 6,000/- pek ṭhin an ni.

He hunah hian DLGR&MC ṭhut khawm hmasain Lawngtlai District chhunga PM-KISAN hnuaia inziak lut thei lo zinga mi - sawrkar hna thawk leh pensioner-te zinga inziak lutte leh chhungkaw khat aṭanga mi pakhat aia tam inziak lutte, mitthi leh chhan dang vanga paih ngaite enfiah tura Block Development Officer leh District Agriculture Officer te kuta a dah an enfiahna report thlir ho a ni a. Beneficiary-te hi a hmuna kal chilha enfiah an ni a; enfiahna (re-verification) report hi DLGR&MC chuan pawmpuiin, State Level Committee-ah theh luh ni se, tih a ni.

Lawngtlai DAO Re-verification report-a a lan danin, January ni 31, 2023 thleng khan Lawngtlai District chhung block palia khaw 176 aṭangin PM-KISAN hnuaia inziak lut beneficiary 77,895 an awm tawh a. PM-KISAN guideline anga felfai thlap beneficiary 24,306 awmin, mahnia ram nei lo, lo nei mi (jhummian) 6,293 an awm bawk a; jhummian-te hi beneficiary-a telh thei turin dil mek a ni a. Hemi huang hniha tel lo beneficiary 47,296 awm thungin, he'ng zingah hian chhungkaw khat aṭanga mi pakhat aia tam inziak lut mi 4,933; mahni khua aṭang ni lova inziak lut mi 39,570; sawrkar hna thawk leh pensioner inziak lut mi 1,720, mitthi tawh 879 leh anmahni chhui chhuah theih loh mi 194 an awm a ni.