Nimin khan Lawngtlai District RMSA leh Eirene Society te tang kawp huaihawtin Lawngtlai Council Venga LADC Hall-ah International Day of Persons With Disabilities hman niin, Lawngtlai Bawrhsap Dr Arun T., IAS chu Khuallian a ni.
Khuallian Lawngtlai DC Dr Arun T chuan rualbanlo vohbikte hi sawrkar chuan a ngai pawimawh em em a ni tiin, an tana hmasawnna tur leh an thawh theih tawk ngaihtuahsakin, sikul an kalna tura an tana awlsam turin hmunhma te pawh buatsaih a ni, a ti a. He’ng vohbikte enkawl tur hian an nu leh pa te bakah, an zirtirtute an pawimawh em em a, an inpekna azirin he’ng mi bikte hian hmasawnna an nei zel dawn a ni, a ti bawk. Khuallian chuan he huna vohbik kalte hnenah thilpek a pe theuh a ni.
He hun hi Lawngtlai District RMSA DPC/DEO Pu Lalzuiliana chuan kaihruaiin, PwD Day tak chu Pathianni kha niin, remchan zawkna avanga a hun sawn a nih thu a sawi a. RMSA Lawngtlai I.E. Co-Ordinator Pi R. Lalnuntluangi chuan report pein, Lawngtlai District chhungah naupang vohbik 120 (mipa 58 leh hmeichhia 62) an neih mek thu sawiin, assesment tih mek zel a ni, a ti. Eirene Society Lawngtlai President Pu H. Lalrinsanga pawhin Eirene Society chuan vohbik naupang 12 an enkawl mek thu sawiin, he’ng naupangte hi ni tin therapy an tihsak thin thu a sawi a. Pi Lalnunthari, District Programme Officer, Social Welfare Dept, Lawngtlai District leh Pi C. Lalramdinchhungi, SSA Lawngtlai te paw’n thu an sawi bawk.
He ni hmannaah hian chawhnu lamah vohbikte puala infiamna hrang hrang hmangin hun hman a ni.
