Vawiin hian Lawngtlai DC Conference Hall ah Central YLA leh tlawmngaipawl hrang hrangte leh District Official pawimawh ten kan hma lawk June ni 30 a Remna Ni champha vawi 30 na lo thleng tur lawm dan tur an rel a, SDO Sadaar Pu Lallawmawma, MCS chuan a kaihruai a ni.

Remna ni hi Mizoram sawrkar thuchhuak angin mumal zawk leh hlawk zawka hman dan tur ruahmanna siam a ni a, kumina Remna ni thupui atan “Hmasawnna leh Hmuingil nan Remna” tih thupui thlan niin kan ram mipuiten remna leh muanna hlutzia an hriat chian zel nan leh remna avanga kan ramin thil tha tam tak kan hmuh chhoh zel zia inhrilhhriat nan he ni hi hman thin tawh tura duan a ni.

Lawngtlai ah chuan he ni ropui tak hi Central YLA Hall ah zing dar 11:00 ah hman tura ruahman niin Central YLA President in a kaihruai anga, khuallian atan Lawngtlai Bawrhsap Dr. A. Muthamma leh khual zahawm atan LADC Executive Secretary Pu Lalramenga te chu beisei niin Remna Ni thupui hmangin Dr. Thangthuama, Principal, Government Lawngtlai College in thu a sawi anga, Mizoram in remna a neih atanga hmasawnna duhawm tak tak kan neih chhoh dan entirna hun Deputy Commissioner Office lamin an buatsaih bawk ang. Zaithiam te, lam thiam te, hnam lam thiamten Remna ni hmangtu mipuite an awi anga, ei leh in tuihnai tak buatsaih tum a ni bawk.

Remna ni champha vawi 30 na hi Central YLA kaihhruaina hnuaiah Politic thil leh pawl tih bik engmah nei lova ram mipui huapzo taka hman tura duan a ni.

He meeting ah hian Central YLA, LWA, MHIP, MJA aiawh te leh District Officer engemawzat an tel a ni.