Vawiin khan Lawngtlai DC Conference Hall-ah Lawngtlai Bawrhsap Pi Shashanka Ala, IAS hovin Lawngtlaia India Republic Day vawi 71-na hman dan tur rel a ni a. Lawngtlaia sawrkar department, zirna in leh tlawmngai pawl hrang hrang ai awhte an tel.

Meeting chuan Republic Day lawmna hi CYLA Playground-ah hman leh ni se, tiin a rel a. Pathianni a nih avangin inkhawm tibuai lo turin zing dar 8-ah tan ni se, tih a ni. Kum dang ang bawkin parade contingent – armed, unarmed, school leh band party te nei lehin, endiktu leh a ti thate hnenah lawmman sem leh ni se, tih a ni.

He meeting-ah hian Republic Day lawmna tura thil pawimawh hrang hrang sawi ho niin, department leh tlawmngai pawl hrang hrangte hnenah mawhphurhna sem rual a ni a. A ni-ah hian sawrkar office, zirna in leh sawrkar quarters-ah te hnam puanzar zar vek tura tih a nih bakah, sawrkar official-te chu a lawmnaa kal ngei tura tih an ni a. He'ng bakah hian Republic Day lawmna puala chhawmdawlna in, jail leh damdawi inahte tanpuina thilpek pek leh, volleyball leh badminton tournament buatsaih rem tih a ni bawk.