No.4999/2020-2021 

Lawngtlai, Mimkut thla ni 11, 2020: Vawiin khan Lawngtlai District Road Protection Squad te chuan National Highway-54 kawngpui kama bungraw dah hnawkte an enfiah.

Road Protection Squad te'n NH-54 kawngpui an endik hma hian Lawngtlai DC Office Chamber-ah Bawrhsap Dr Andrew H. Vanlaldika, MCS hovin hma lak dan tur sawi ho hmasak a ni a. Bawrhsap chuan NH-54 kawngpui kama bungrua leh lirthei chhia dah hnawkte then faina tur thupek tihchhuah a nih tawh thu sawiin, mipuite that tlanna tur a nih avangin thlei bik neih a rem loh thu leh tha taka hrilh an nih hnua thu awih lote chu dan anga hrem zel an nih tur thu a sawi a. Sumo dinna tur hmun ruat bik (stand)-a mimal lirthei dah a ni thin chu tha a tih loh thu te, lirthei indin thuahin nasa taka kawngpui a tihchep thu leh a ngaihmawh thu te sawiin, he'ngte hi an hma lakna atana chhinchhiah bik ni se a duh thu Team member-te chu a hrilh a ni.

Road Protection Squad te hian Lawngtlai AOC Veng atanga Siaha lam kawtchhuah 71 RCC Camp thleng vawiin khan an enfiah a. NH-54 kawngpui tichep zawnga in sakna bungraw dah hnawk te, tuiluankawr hnawh phui zawnga lung leh rawra dah leh kawngpui tichep zawnga lirthei dah te enfiahin, he'ng an endik huam chhunga kawngpui kama bungraw dahtute chu ni 7 chhunga an bungruate lo senghawi vek tura tihna lehkha an pe a. Ni 7 hnua an endik leh huna an bungruate an lo senghawi lo a nih chuan dan anga an chungah hremna lek a nih tur thu an hrilh zel a ni.

Vawiina Protection Squad feh chhuakte hi Team Leader Pu K. Lalhlimpuia, SDC chuan hovin, team member 5 nen an thawk chhuak a ni.