Vawiin khan Road Safety Week 2018 chu Lawngtlai DC Conference Hall-ah Lawngtlai Bawrhsap Dr Arun T., IAS chuan a hawng.

Bawrhsap chuan lirtheia chetsualna chu thihna thlen chhan tam ber pakhat a nih thu sawiin, chumi veng tur chuan fimkhur taka lirthei khalh a tul a ni, a ti a. Chetsualna pumpelh turin driver-te’n dan an zawm a, hawihhawm tak leh nun uluk tak chunga lirthei an khalh thin a pawimawh a, chetsual palh thulhah pawh first aid pek dan an hriat tel a pawimawh bawk a ni, a ti a. Fimkhurna thu hi sikulah pawh a tam thei ang bera inzirtir ni se tha a tih thu a sawi bawk.

Lawngtlai SP Pu Lalsanglura MPS pawhin thu sawiin, ram hmasawn leh hmasawn loh lanna chu lirthei a ni, a ti a. Lirtheia chetsualna tam ber chu traffic dan zawm loh vang a ni tiin, traffic dan zawm tha turin driver kal khawmte chu a chah a. Driver an hawihhawmna khua chu khaw nuam a ni zel thin tiin, Lawngtlai khawpui chu khaw nuam taka siam turin hawihhawm taka lirthei khalh thin turin driver-te chu a chah bawk.

Road Safety Week hawnna hi District Council Transport Officer Pu F.Lalhmachhuana'n a kaihruai a. Lawngtlai DTO Pu Lalrinawma MCS chuan fuihna thu tawi a sawi a. Resource person pahnih awmin, Traffic O/C Pu T. Chanchinmawia chuan driving manner & etiquette chungchang a sawi a; MVI Pu Joseph Lalthansanga Pachuau chuan MV Acts & Rules chungchang a sawi thung a. DIPRO Pu C.Lalhruaitluanga'n lawm thu sawiin hun a khar a ni.

Week hawnnaah hian Lawngtlai District Road Safety Committee member te, traffic leh enforcement lam te, motor neitu leh driver te an tel.

Road Safety Week vawi 29-na hi February ni 12-18 chhung hian hman tur a ni a. Hemi chhung hian thuneitu (traffic leh enforcement) lamin uluk takin special drive beihpui an thlak dawn a. Week chhung hian driver tha ber, traffic police tha ber leh motor fai ber te thlan chhuah leh tur niin, he'ng thlan chhuahte hi February ni 22-ah lawmman hlan an ni ang.