Mizoram Information Commission leh Information & Public Relations Department tang kawp huaihawtin Right to Information (RTI) Week 2016 hawnna chu DC Conference Hall, Lawngtlaiah vawiin (5.10.2016) chawhma dar 11 khan buatsaih a ni a. Lawngtlai DRDA Project Director Pu H.Dolianbuaia, MCS chu Khuallian a ni.

Khuallian chuan RTI Act pawimawhna leh a tangkaina sawiin, sawrkar lam leh mipui lam paw’n hman thiam ve ve a tul thu a sawi a. Sawrkar Department-a SPIO/SAPIO te chuan zawhna zawttute tha taka lo dawnsawn a, an mamawh anga lo puih zel chu kan tih tur a ni tiin, a zawttute paw’n sawrkar hna thawkte hna thawh tibuai zawnga che lo va, thil tangkai leh hlawkpui theih tur chauh zawt thin turin a chah a. Lang tlang sawrkar siam turin mipuite’n tun aia tangkai zawka RTI Act chu hman tangkai thiam leh hman uar a tul a ni, a ti.

He hun hi Lawngtlai DIPRO Pu C.Lalhruaitluanga, MIS chuan kaihruaiin, kal khawmte lawmna thu a sawi a. Kum 2011 atanga RTI Week hman tan a nih dan leh a tangkaina te a sawi bawk. Lawngtlai Sub-Deputy Commissioner Pu Vanlalchhuanliana, MCS chuan powerpoint presentation hmangin RTI Act 2005 leh Mizoram RTI Rules 2010 chungchang hriat tur pawimawhte a zirtir a. Hemi hnu hian zawhna leh chhanna hun leh, sawi hona hun hlawhtling tak hman a ni bawk.

RTI Week 2016 hi October ni 5-12, 2016 chhung hian hman a ni dawn a. He Week hi mi tinin RTI tangkaizia an hriat thar nan leh hman dan an thiam theih nana inzirtirna hun atana ruahman a ni.

Vawiina Lawngtlaia a hawnna hunah hian sawrkar department hrang hranga SPIO leh SAPIO te, VC leh tlawmngai pawl ai awh te, chanchinbu mi leh zirlai naupangte bakah, RTI lama tui mi eng emaw zat an tel a ni.