1397/2024-2025

Dated Lawngtlai, 31st July, 2024: Vawiin chawhnu dar 2 khan Lawngtlai District - a 'Safai Apnao Bimaari Bhagao (SABB) Campaign' kalpui dan tur relin DC Conference Hall-ah thutkhawm neih a ni a. Pi Margaret J. Vanlalremmawii, DPO (UD&PA) chuan thutkhawm hi a kaihruai.

Pi Margaret J. Vanlalremmawii chuan kalkhawmte hnena lawmthu sawina a nei hmasa a. Faina kawnga hmasawnna tha nei turin sawrkarlaipui leh Mizoram sawrkarin theih tawp chhuahin 'cleanliness drive leh campaign' chak takin a kalpui mek a ti a. A bik takin fur ruahtui tlak tam laiin 'Malaria'  leh natna dang tam tak a hluar hle thin a, chutiang um bo tur chuan 'Safai Apnao Bimaari Bhagao (SABB) Campaign'  hi kalpui tura tih a ni, a ti. Safai Apnao Bimaari Bhagao (SABB) Campaign chu ni 15, July atanga ni 31, August, 2024 chhung kalpui tura duan niin 'Stop Diarrhoea Campaign' nena kalpui kawp a ngaih dawn bawk avangin  hemi chhunga  faina kalpui dan tur ruahmanna fel fai tak siam a tul thu a sawi.

Pi Margaret J. Vanlalremmawii chuan rilru leh taksa hrisel nei turin fai leh thianghlimna kawngah tha thlah loa hmalak a tul hle a ti a. Sawrkar chauhin hma a la thei lo tih tarlangin, NGO, Kohhran leh khawtlang mipuite tan tlan a ngai hle a ti. Mizoram sawrkar hnuaia  Urban Development & Poverty Alleviation (UD&PA) ten kum tinin Faina lama inelna a buatsaih thin tih sawiin, he in elna ah hian  Lawngtlai district dinhmun a chhuanawm loh fo thin a, theihtawp chhuah a tan tlan a ngai a ti. Faina hapta emaw faina hunpui hmang chhunga hnathawhah  chauh duhtawk mai lo a, nitin a faina lama theihtawp chhuah zel turin Lawngtlai mipuite a sawm nghal a ni.

Thutkhawmah hian 'Safai Apnao Bimaari Bhagao (SABB) Campaign'  kalpui dan tur relho a ni a. Lawngtlai khawpui chhunga veng zawng zawngah ' Cleanliness Drive' August thla tawp lamah kalpui ni se an ti a, VCP ten hma lo la se tiin, hnatlang thawh ni a mamawh hrang hrang- garbage bag, bleaching powder, gloves leh refreshment chu DPO, UD&PA ten tum ni se an ti a. Lawngtlai khawpui chhunga zirna In zawng zawng (sawrkar leh private) ten ni 2- 17, August chhungin 'Cleanliness Drive' lo kalpui se tih a ni. Faina lam inzirtirna  'Awareness Campaign' chu sawrkar School-3 leh Private School - 1 ah ni 19-23 August chhungin  neih ni se;  DEO, Lawngtlaiin school te hi lo thlang se tih niin, Education Department, LADC ten School 3 lo thlang  se an ti bawk. Ni 26- 30 August chhungin Anganwadi Centre -3 ah 'Awareness Campaign'  kal pui ni bawk se tiin, Zirna in leh Anganwadi - a Awareness Campaign - neih hunah District Hospital, Lawngtlai leh PHE Department atangin 'resource person'  tirh ni se an ti bawk. Kaladan Multi- Modal Transit Transport (KMMTTP ) Road chu tihfai a ngai hle tih pawmin, ni 23, August hian NSS, Government Regional Higher Secondary School, Lawngtlai  ten lo thianfai se an ti a. Lawngtlai khawpui chhunga Community/ Public Toilet awm ang angte chu tihfai ni se, a bik takin tuizem (tanky) chhin nei lo te chu a chhin nei vek tura hmalak ni se an ti. DAY-NULM hnuai 'Door to door mobilization' neih hunah faina lam inzirtirna uar zawka kalpui nise an ti bawk.

Vawiin 'Safai Apnao Bimaari Bhagao (SABB) Campaign'  kalpui dan tur sawihonaah hian Dy.Chief Medical Officer, District Education Officer, SDO- PHED, Education Officer, LADC, leh Lawngtlai Town chhunga VCP leh an aiawh te an tel thei a. Pi. Margaret J. Vanlalremmawii, DPO (UD&PA) chuan lawmthu sawina neiin hun a khar a ni.