1470/2023-2024

2023 Thlazing ni 11: Azadi Ka Amrit Mahotsav (AKAM) hmawr bawk nana Meri Maati Mera Desh campaign kalpui mekah Lawngtlai District chhunga sawrkar office hrang hrangte chuan state sawrkar kal tlanga sawrkar laipui aṭanga tih tut ruahmante ṭha takin an bawhzui hlawm.

Vawiina Lawngtlai Bawrhsap Pu H. Lalhmingthanga hova Lawngtlai DC Conference Hall-a he campaign khuh hawnna hman a nih hnuah Lawngtlai Bawrhsap office leh office hrang hrangte chuan mahni office ṭheuhvah ram hmasawnna atana thawk turin Paanch Pran Pledge thu an tiam a. Thu tiam zawh hian lei (soil) kenga thla lain, ram tana leiṭha, ram hmasawnna ṭhantirtu ni tura an intiamna an lantir a ni.

AKAM hma lakna urhsun leh ngawrh taka lo kal chhohpuitu Lawngtlai District Rural Development Office chuan Meri Maati Mera Desh campaign hi ngawrh lehzuala kalpuiin, vawiin khan he campaign pual hian "Mitti Ko Naman, Veeron Ka Vandan" hun hmangin, Lawngtlai DRDO Project Director Pi Marilyn Rualzakhumthangi hovin ram tana zalenna sualtu thi tate hriat reng nan leh ram tana an inhlanna avanga ram ropui taka India ram a din chhuah hriat reng nan an office bulah thing an phun a. Ram tana fa hrin man awm ni ve tura intiamna thu (pledge) chhiar rualin, lei (soil) kenga thla lain an intiamna an nem nghet a. Ram inpumkhatna vawng him tura an intiamna leh martarte an zahna lantir nana hming ziak (signature campaign) an buatsaih bakah, minit khat chhung ngawi renga dingin, ram tana nunna chante sunna hun an hmang bawk.

Meri Maati Mera Desh campaign hi hma lakna ṭhuang hrang hrangin August thla chhunga kalpui tura ruahman niin, Lawngtlai District-ah pawh ngawrh taka kalpui zel tura ruahman a ni.