No.663/2020-2021

Lawngtlai, Tau thla ni 29, 2020: COVID-19 vanga ram chhunga inkharkhip kalpui mekah Mizoram mi, hmarchhak state dang - Assam, Manipur, Meghalaya leh Tripura-a tangkhangte hruai haw tura Mizoram sawrkarin ruahmanna a siam bawh zuiin, Lawngtlai District mi leh sa lo haw turte lo dawnsawn dan tur leh sawrkar ruahmanna zul zuia hma lak dan tur ngaihtuahin vawiin khan hemi kaihhnawih official pawimawhte chu Lawngtlai Bawrhsap Pi Shashanka Ala, IAS hovin a pisaah an thu khawm.

Tun dinhmuna hriat theih chinah he'ng state pali atanga Lawngtlai District mi leh sa lo haw tur hi mi 49 an awm a. Sawrkarin ruahmanna a siam angin District headquarters-ah lo dawngsawngin, rapid test kit hmanga lo endik vek hnuah Lawngtlaia sawrkar enkawl inkhung hranna (quarantine facility)-ah ni 14 chhung khung hran an ni ang.

He'ng state pawn atanga lo haw turte khung hranna leh enkawl zuina atana mamawh leh thil pawimawh hrang hrang sawi zui niin, Lawngtlaia quarantine facility chu mi 55 vel awm theihna tura ruahman ni se, tih a ni a. He'ng lo haw tharte bakah hian anmahni rawn phurtute pawh Lawngtlai District mi an nih chuan khung hran ve tur an ni a. An ei leh in tur leh an riahna tur bakah, an mamawh tur thil tul dang atan ruahmanna siam nghal a ni.

Sawrkarin a ruahman ang chuan he'ng state palia tangkhangte hruai haw hi April ni 30 atanga May ni 2 chhungin zawh fel tur a ni a. Hri leng laka himna tur kawng hrang hrang zawm chunga fimkhur taka hma lak tum a ni.